Recent Posts

Breaking News

Namatyag misis, papa sa 6 ka bata gibaha og tabang


MEKANIKO nga namatyan og asawa human gianak ang ilang kaluha niadtong Hulyo 10, 2020, gibaha og tabang human mag-viral ang nahitabo kaniya sa social media.

Si Romeo Oyao Jr., 30, amahan sa unom ka mga bata, duha kanila mga masuso pa, gitabangan sa Squad 032, usa ka grupo sa mga mahiligon sa motorsiklo ug sa TCH Riders nga gipangulohan ni Meowme Lee ug Cody Troy, gipatukoran og balay.

Ila usab nga giatiman ang panginahanglanon sa identical twins nga babaye.

"Dako kaayo ilang natabang nako. Wala ko kahibawo asa ko magsugod pagpangayo og pasalamat nila kay wala gyud ko magdahom sa ilang tabang kay abi nako habal-haba lang apan aduna may niabot nga engineer ug nangutana asay sukdan para sa balay," padayag ni Oyao.

Karong adlawa, Agusto 16, ang mga rider magbayanihan para matiwas ang kongkreto mga balay ni Oyao isip hulip sa daw kamalig nga pinuy-anan sa iyang pamilya mga giatupan lang og tolda.

Si Mark Anthony Anthony Boyo, tag-iya sa SMB Tourist Transport, nitabang sab kang Oyao para ma-release ang iyang motorsiklo nga gisakmit sa pulis niadtong Hulyo 10 human siya ni-rescue sa usa ka nadaot nga sakyanan diin siya gibayran sa tag-iya.

Ang suhol niadto iyang ipalit og gatas ug bugas sa iyang pamilya.

Samtang siya nagbiyahe padung sa nadaut nga sakyanan, siya nasangit sa checkpoint sa Nivel Hills sa Barangay Busay.

Ang tag-iya sa SMB Tourist Transport, kinsa usa sab ka motorcyclist, maoy moparehistro sa expired nga registration sa motorsiklo ni Oyao, nihatag og usa ka sakong bugas ug iyang gipatrabaho isip mekaniko.

"Nakadungog ko nga wala siyay trabaho unya ang tabang sa riding community dili molahutay hangtod sa hangtod. Mao na nga kon andam siyang motrabaho ug magbinuotan siya, ako siya i-hire isip mekaniko sa SMB Tourist Transport sugod karong Agusto 16," padayag ni Boyo.

First finisher sa Cebu 600 ug Ormoc 1000 endurance challenge nga si Boyo, nidayeg sa gibuhat sa kauban niyang mga motorista sanglit gawas sa joy ride, gipakita sab nila ang pagkamatinabangon.

"Dako akong pasalamat sa atong riding community diri sa Cebu. Unya mag-pm sila nako usahay kon unsay akong matabang para ni Romeo. So, nangutana ko unsay kuwang sa ilang tabang. Unya usa sa problema nga ma release unta ang motor nga na-impound ug ni kontak kong Kap. Yvonne Cania para ma release ang motor, diin siya ang nibayad sa violation," dugang ni Boyo.

Si Cania, kinsa maoy Cebu City Medical Center (CCMC) Hospital Administrator, niingon nga kon unsay iyang madawat nga tabang gawas sa iyang gihimo, iyang itunol ngadto kang Oyao.

Kon manginahanglan siya sa serbisyong medical labi na sa managkaluhang mga masuso, motabang ang CCMC.

"Subo kaayo palandungon ang nahitabo ni Romeo Oyao. Mao nang ni-volunteer mi kon asa pwede makatabang nga maluwas ang iyang pamilya, labi na namatay ang iyang asawa," padayag ni Cania.

Gumikan sa tabang sa lainlaing mga individual, ang motorsiklo ni Oyaw iya nang nadala pauli sa Barangay Bonbon, bukiran sa Cebu City.

Subli niyang nakauban ang iyang pamilya nga wa na ang iyang asawa, kinsa magsaulog unta sa iyang ika-30 nga adlaw natawhan niadtong Huwebes, Agusto 13. (PAC)


Source: Sun.Star Superbalita (https://www.sunstar.com.ph/article/1867052/Superbalita-Cebu/Balita/Namatyag-misis-papa-sa-6-ka-bata-gibaha-og-tabang?ref=rss&format=simple&link=link)

No comments