Recent Posts

Breaking News

Mga turista pasul-ubon og face shield, air purifier


GAWAS nga pasul-ubon og face mask, gimando na usab ang kanunay nga pagsul-ob og face shield ug air purifier sa tanan nga mga turista nga moduaw sa mga tourist destination sa Lalawigan sa Sugbo.

Kini maoy buot ipatuman ni Cebu Governor Gwendolyn Garcia sa Probinsya aron malikay sa coronavirus disease 2019 (Covid-19).

Ang Lalawigan sa Sugbo nagpabilin sa modified general community quarantine (MGCQ) sud na sa kapin sa duha ka buwan, diin gitugot na ang pagbukas sa tourism activities.

Apan ubos gihapon sa health standards nga gipatuman sa DOH aron kalikayan ang pagsulbong sa mga positibong kaso sa Covid.

Usa ka tigom ang gipahigayon sa gobernador tali sa mga sakop sa shipping companies nga maoy nag operate paingon sa kaislahan sa Camotes nga bag-o lang miabli sa tourism activities niini.

Sa nasabutan, gikinahanglan nga moagi ang mga pasahero sa temperature checking, paghunaw sa kamot, pagbutang og foot baths sa terminal ug sa barko.

Kon dunay pasahero nga makabaton og temperature nga 38-degrees Celcius, pataas gidid-an kini pagsakay sa barko.

Gilaraw sa kagamhanan ang pag link sa shipping firms sa tourism portal sa Lalawigan alang sa mas sayon nga transaksyon.

Sa kasamtangan, upat na ka mga inila nga tourist destinations sa Probinsya ang nagbukas.

Kini naglakip sa whale shark watching sa Oslob, diving sa lungsod sa Moalboal, ATV Adventure ride sa Barili, ug ang klase-klase nga rides ug adventures sa kaislahan sa Camotes. (ANV)


Source: Sun.Star Superbalita (https://www.sunstar.com.ph/article/1867102/Superbalita-Cebu/Balita/Mga-turista-pasul-ubon-og-face-shield-air-purifier?ref=rss&format=simple&link=link)

No comments