Recent Posts

Breaking News

Mga tunghaan gamiton pang isolation centers hangtod mahuman ang Norkis ug NBT


SA PANAHON nga mahuman na ang isolation center sa Norkis Park ug Cebu North Bus Terminal, di na mogamit ang Dakbayan sa Mandaue sa mga tunghaan aron himuong isolation center.

Tungod kay gisibog ang klase ngadto sa Oktubre 5 gikan sa Aguyto 24, ang Kagamhanan sa Dakbayan sa Mandaue mipadayag sa ilang interes nga mogamit una sa mga eskwelahan hangtod mahuman ang gipangtukod nga isolation centers.

Ang Department of Education nitugot lang unta nga hangtod sa Agusto 16 ang paggamit sa mga tunghaan agig pangandam sa pagbukas sa klase bisan way gitugot nga face-to-face.

Apan tungod sa pagbutang sa National Capital Region (NCR) ug ubang mga lalawigan sa Luzon ubos sa modified enhanced community quarantine (MECQ), naoktaba ang pagbukas.

Kini tungod kay nakaapekto sa pagpangandam sa mga tunghaan ang MECQ

Sa miaging semana, nisaad ang Kagamhanan sa Dakbayan nga mahuman ang duha ka isolation centers karong buwana.

Sigon ni Atty. John Eddu IbaƱez, executive secretary ni Mandaue City Mayor Jonas Cortes, nga kon mahuman na ang isolation centers, ibalhin dayon ang mga pasyente nga nabutang mga eskwelahan ngadto sa mga isolation center.

Human sila maka-pull-out sa mga eskwelahan, i-disinfect dayon kini aron maandam sa pagbalik sa klase.

Sa panahon nga mabalhin na ang mga pasyente, adto ibutang ang mga way simtomas sa Norkis Park.

Samtang ang adunay simtomas nga mild ngadto sa moderate, adto sa Cebu North Bus Terminal i-admit.

Ang konstruksyon sa Norkis Park gisugdan na.

Gani aduna na ni division aron himuon na og kwarto.

Matag isolation center, makaakomodar og 64 ka pasyente sa usa ka phase. Sa ikaduha nga phase, 38 ka pasyente ang mapasulod apan mamahimo pa kini mapadak-an aron makasulod ang 150 ka mga pasyente.

Sa Lunes, Agusto 17, 2020, ang dakbayan sa Mandaue adunay kinatibuk-ang kaso sa Covid-19 2,025, diin ang 336 aktibo nga mga kaso, 1,607 ang nakarekober ug 82 ang nangamatay.

Bisan pa sa mga numero, di gihapon mokompyansa ang dakbayan sa Mandaue tungod kay di pa luwas ang 300 nga aktibong kaso ug mamahimo pa kining mosaka.

Apan, saad sa Dakbayan nga padayon gihapon ang ilang paghingusog sa ilang stratehiya sa pakigkumbati sa Covid-19. (KFD)


Source: Sun.Star Superbalita (https://www.sunstar.com.ph/article/1867409/Superbalita-Cebu/Balita/Mga-tunghaan-gamiton-pang-isolation-centers-hangtod-mahuman-ang-Norkis-ug-NBT?ref=rss&format=simple&link=link)

No comments