Recent Posts

Breaking News

Mga paningkamot batok sa Covid-19


GIUNSA pagdumala sa Cebu City Government ang coronavirus disease 2019 (Covid)-19 crisis ug ang pagtubag sa panginahanglan sa gatusan ka-libo nga pamilya panahon sa pandemya?

Ubos sa liderato ni Mayor Edgardo Labella ug Bise Mayor Michael Rama uban sa mga miyembro sa Sangguniang Panlungsod (SP), inabagan sa tabang sa national government, nilampos ang dakbayan pagkontrolar kon wa man mahingpit ang pagbuntog sa Covid-19.

MANDO SA MAYOR

Una niini, si Labella niisyu og 28 ka executive orders (EO) ug 27 ka memorandum gikan niadtong Marso hangtod sa Agusto niining tuiga, mapugngan lang ang pagkuyanap sa maong sakit.

Niadtong Marso 13, si Labella nipagawas sa iyang labing una nga EO nga nag-ulohan “Guidelines on the precautionary and safety measures against the Coronavirus disease 2019.”

Gumikan niini, ang mayor nialerto sa Emergency Operations Center (EOC) aron pag-monitor ug paghimo og aksyon labot sa pag-abot na sa Covid-19 sa dakbayan.

Iya dayon gitahasan si Dr. Daisy Villa sa City Health Department pag-deploy og mga health personnel didto sa airport ug nitabang sa Bureau of Quarantine (BOQ) ug Department of Health.

Ang mayor nakigtagbo dayon sa lainlaing ahensiya sa gobyerno, public ug private hospitals aron mahibaw-an asa dapita makatabang ang City Hall.

Human niadto, ang dakbayan pinaagi sa SP nideklara og state of preparedness pinaagi sa usa ka resolusyon.

Ang mayor nihangyo ngadto sa BOQ ug Philippine Coast Guard aron dili makasulod sa Cebu City ang mga crew sa barko nga gikan sa lainlaing nasod.

Ang City Government ni-disinfect sa mga lugar nga dagsaanan sa mga tawo sama sa public market ug major roads.

Ang City Disaster nipahigayon og mga simulation exercise didto sa City Hall aron sa paggiya unsay husto nga buhaton kon adunay positibo sa virus.

MONITORING

Ang City Government inabagan sa Department of Trade and Industry, Food and Drug Administration, Department of Health, Criminal Investigation and Detection Group ug Philippine National Police ug nihimo og ocular inspection sa mga pharmacy aron sa pag-monitor sa ilang baligya nga face mask, alcohol ug uban kon wala ba nagpaburot sa ilang mga presyo.

Niapud-apod usab og leaflets ang siyudad alang sa information drive alang sa public awareness batok sa Covid-19.

Sa samang buwan, si City Administrator Floro Casas Jr., nakigtagbo sa department heads ug city councilors aron ilang hisgotan ang pagpangandam nga buhaton sa siyudad batok sa virus.

Aron pag-monitor sa mga tawo nga mosulod sa City Hall, nibutang sila og temperature scanner ug disinfection sa government buildings.

Ang mayor nakigtagbo sa educational institutions aron hisgotan ang graduation rites gumikan sa nagsaka nga kaso sa Covid-19 sa nasod.

KLASE GISUSPENSO

Niadtong Marso 16, gikansela ni Labella ang pagpahigayon sa klase hangtod Marso 28 gumikan sa hulga sa virus.

Ang amahan sa dakbayan niluwat og memorandum niadtong Marso 15 nga nagpatuman sa four-day work sa City Hall aron makuhaan ang exposure sa mga trabahante.

Gipahunong usab sa mayor ang night market activity sa Colon gumikan kay daghang tawo ang magtapok.

Niadtong Marso 15 , nag-isyu og EO- 52 si Labella nga nagpaubos sa siyudad ilawom sa general community quarantine (GCQ).

Pinaagi sa mga EO, gipatuman ang liquor ban sa public places, nagmugna og Inter-Agency Task Force on Covid-19, gisuspenso ang operasyon sa recreational centers, fitness gyms, sinehan, casino, bars ug mga club ug wala na kolektahi og arkabala ug abang ang stall holders sa Carbon Market.

Ang Cebu City Police Office nibutang og 69 ka quarantine control points ug 15 ka border checkpoints aron pagkontrolar sa mga tawo nga mosulod sa Cebu City.

MIGAHIN OG P1-B

Ang City Government nigahin og kapin P1 bilyon aron pagpalit og bugas ug food packs alang sa kapin 200,000 ka pamilya, pagpalit og tulo ka PCR machines nga gihatag ngadto sa DOH 7, pagpalit og 20,000 ka test kits, 34,000 swab kits nga maoy gigamit sa mass testing, 20,000 ka PPE’s nga gigamit sa frontlines, nipalit og duha ka negative pressure ambulance, pagpalit og 500,000 face masks ug meal packs alang sa frontliners.

Aron malimitahan ang mga tawo nga naa sa gawas, si Labella niisyu og stay at home order pinaagi sa EO 59 aron magpuyo sa balay ang mga nag-edad og 21 anyos paubos ug 65 pataas.

Aron mapangandaman ang pagdaghan sa kaso sa Covid-19 ug maatiman ang matakboyan, ang City Government nitukod sa kapin P50 milyones nga Quarantine Facility nga nakaayo na og dul-an 400 ka mga mild ug moderate symptomatic Covid positive.

Aron paghatag og dugang ayuda ngadto sa barangay, si Labella nihatag og tag P3 milyones, P2 milyones ug P1 milyon ngadto sa mga barangay kapitan depende sa populasyon sa barangay kansang ayuda niabot og P130 millions.

Nakig-partner usab ang City Government ngadto sa hotels, inns, aron adunay temporaryong mapuy-an ang medical frontliners kinsa nag-atiman sa mga pasyente sa tambalanan.

MOBILE MARKET

Gilusad sab ni Labella ang mobile market nga maoy mobisita sa kabarangayan aron dili na moadto sa Carbon Market ang mga tawo ug malimitahan ang lihok sa mga tawo.

Sa ikaduhang hugna, nanghatag na usab si Labella og tag P1 milyon sa 80 ka barangay alang sa dugang pagpamalit og bugas ug de lata diin ang kapitan maoy gitahasan nga mamalit.

Ang City Governmemt nihatag og tag 1 ka sakong bugas (50 kl) ngadto sa kapin 1,000 ka mga driver sa PUJ ug taxi.

Ang City Hall nihatag usab sa tag P6,000 ngadto sa 139,000 ka pamilya nga benepisyaryo sa SAP gikan sa national government balor og P836 milyones.

Bisan sa peligro sa Covid, ang mayor nihukom sa pag-distribute sa tag P3,000 nga financial assistance sa mga senior citizen ngadto sa kapin 80,000 ka mga benepisyaryo para aduna silay ikagasto niining panahon sa pandemya.

BALIK BUHAY

Ang City Government, DOH 7 ug Department of Interior and Local Government 7 ug mga barangay kapitan nagkasabot alang sa ipahigayon nga mass testing alang sa Project Balik Buhay aron sa inanay nga pagdawat sa new normal.

Ang City Government niabli sa CCQC ug ang Bayanihan Executives niabli sa Sacred Heart School ug IEC Pavillion isip quarantine facility sa mga symptomatic Covid positive.

Si Secretary Galvez kinsa nianhi sa dakbayan, nidayeg sa mga lakang nga gihimo sa Cebu City gumikan sa ilang kaandam pagtubag kon adunay kaso sa Covid.

Niadtong Hunyo ug Hulyo, nisaka og maayo ang kaso sa siyudad ug si Presidente Rodrigo Duterte nipadala kang Secretary Roy Cimatu, ret. Major General Mel Feliciano, Assistant Secretary Alexander Macario, DOH Secretary Francisco Duque, ug Defense Secretary Delfin Lorenzana aron tabangan ang Cebu.

Gikan sa kapin 200 ka kaso matag adlaw ug dihay higayon nga niabot og kapin 300 ka kaso sa usa lang ka adlaw, niubos sa kapin 100 ug sa nilabay nga kapin 2 ka semana, wala na molapas sa 40 ka mga kaso sa Covid ang dakbayan matag adlaw

Ang Cebu City kaduha napaubos sa GCQ, kaduha sa ECQ, kausa sa MECQ ug karong bag-o, Agusto 16 hangtod sa 31, pabilin sa GCQ.

Kini gumikan sa paghingusog sa contact tracing, na-isolate ang adunay close contact ug na-test diin napugngan ang posible unta nga pagtakod ngadto sa uban.

FRONTLINERS

Ninng ulahi, si Labella mopatman sa iyang saad nga mohatag og P10 mil nga allowance sa medical frontliners sugod ning Agusto hangtod sa Oktubre.

Sa pagpakaron, ang kurva sa graph sa kaso sa Covid-19 sa dakbayan nagkaubos ug gilauman nga matul-id na.


Source: Sun.Star Superbalita (https://www.sunstar.com.ph/article/1867164/Superbalita-Cebu/Balita/Mga-paningkamot-batok-sa-Covid-19?ref=rss&format=simple&link=link)

No comments