Recent Posts

Breaking News

Mga kaso sa Covid sa nasod duol na sa 140K


ANG Department of Health (DOH) sa Martes, Agusto 11, 2020, nitaho sa dugang 2,987 cases ka mga kaso sa coronavirus infection, nga nidala sa kinatibuk-ang gidaghanon sa mga kaso ngadto sa 139,538.

Sa iyang case bulletin sa alas 4 sa hapon, ang DOH nitaho og dugang 280 nga naulian, nga nidala sa kinatibuk-an ngadto sa 68,482. Dunay dugang 19 nga nangamatay nga nidala sa gidaghanon sa namatay sa coronavirus 2019 (Covid-19) ngadto sa 2,312.

Sa kinatibuk-ang mga kaso, 68,794 ang aktibo, nga mao ang mga pasyente nga naa pa sa mga ospital o quarantine. Ang 87 nga nagdoble gitangtang gikan sa kinatibuk-an.

Sa nangasakit, ang DOH niingon nga ang 1,374 ka mga kaso nahitabo gikan sa Hulyo 29 ngadto sa Agusto 11 samtang ang 1,591 gikan sa Hulyo 1 ngadto sa 28. Siyam ang nahitabo sa Hunyo, tulo sa Mayo, pito sa Abril ug tulo sa Marso.

Dul-an sa katunga sa bag-ong mga kaso, 1,510, gikan sa National Capital Region (NCR).

Ang mga lalawigan nga dunay labing taas nga mga kaso mao ang Cavite nga dunay 398, Laguna, 144, Iloilo, 135 ug Cebu, 119.

Sa dugang 19 nga nangamatay, walo nahitabo sa Agusto, pito sa Hulyo ug usa sa Hunyo samtang tulo sa Abril.

Pito sa nangamatay gikan sa NCR, unom gikan sa Central Visayas, tulo gikan sa Calabarzon ug tag usa sa Ilocos ug Western Visayas. Usa ka repatriate ang namatay sa Hulyo. (Sunstar Philippines)


Source: Sun.Star Superbalita (https://www.sunstar.com.ph/article/1866646/Superbalita-Cebu/Balita/Mga-kaso-sa-Covid-sa-nasod-duol-na-sa-140K?ref=rss&format=simple&link=link)

No comments