Recent Posts

Breaking News

Mga durugista di bakunahan


MGA durugista, pusher man o user lang, di makapaabot nga maapil sa bakuna batok sa coronavirus disease 2019 (Covid-19) nga gipaabot nga moabot karong Disyembre sa Pilipinas.

Mao kini ang sulti ni Presidente Rodrigo Duterte atol sa iyang nasudnong pagpamulong atol sa iyang tigom sa MalacaƱang sa Hulyo 30, 2020 uban sa iyang piniling mga sakop sa Kabinete. Matod ni Duterte nga alang kaniya, ang mga durugista di tawo.

“Di tao ang tingin ko sa kanila. Mga drug pusher, drug lord, aso. Sinisira ninyo ang Pilipinas,” matod ni Duterte.

Matod sa Presidente nga iya na lang ihatag ngadto sa ubang mga kabos ang mga bakuna kay sa idapat sa mga durugista. “Mga drug pusher, wala kayo,” dugang niya.

Iyang seguruon nga way durugistang makapahimus sa bakuna nga ihatag nga libre sa kagamhanan ngadto sa labing kabus ug hut-ong sa mga lumolupyo nga naa sa middle income.

DI NA MABALAKA

Si Duterte niingon nga magpaabot lang og pipila ka mga buwan hangtod sa Disyembre kay moabot ra ang mga bakuna batok sa Covid-19.

Human unya sa pagpamakuna, mahibalik na sa “normal” ang nasod.

“Meron akong bakuna. Ang hiling ko sa inyo, ganito: magtiis lang kayo ng konti dahil nga sa hawaan. Ngayon, marami na ang nahawa. It’s because ‘yung iba, ayaw ninyong magpapigil,”

“I promise you, by the grace of God, I hope by December we would be back to normal,” dugang niya.

Kon moabot na ang bakuna, libre kining ipanghatag ngadto sa katawhan, apan prayoridad ang mga kabos nga nakapahimus sa social amelioration program, middle income nga mga pamilya, kapulisan, military ug Cabinet members.

Apan matod niya nga ang mga adunahan mangita na lang og ilang bakuna kay masarang nila ang presyo.

“Yung mga mayayaman, huwag ninyo akong isipin kasi hindi ako nag-iisip sa inyo,” matod ni Duterte.

MILITAR

Ang bakuna di niya ihatag ngadto sa mga barangay kapitan aron malikayan nga dunay pamulitika. Iyang tahasan sa pagpamakuna mao ang armadong kusog sa nasod.

“Sino ang magdala nito? Military, military lang. I am asking the Armed Forces,” matod sa Presidente.

Ang mga bakuna ipadala ngadto sa mga ospital, puericulture centers ug bisan sa police station, apan ang militar gihapon ang modapat sa bakuna.

“Punta lang kayo ng ospital, may mga military doon. Punta lang kayo ng police station...pero military ang tutusok sa ‘yo,” si Duterte niingon.

Si Finance Secretary Carlos Dominguez III, sa iyang bahin, niseguro nga ang kagamhanan dunay igong pundo nga gikinahanglan sa pagpalit sa bakuna.

Siya niingon nga labing minos P20 bilyunes ang gikinahanglan, kana kon ang bakuna nagbalor og 10 dolyares matag usa, duha ka doses sa matag tawo ug mga 20 milliion ang bakunahan.

Lakip sa gasto ang serbisyo ug transportasyon, siya niingon nga ang budget matag tawo mga naa sa P1,200.

“Kayang-kaya ho ng Landbank at DBP i-finance ‘tong purchase ng vaccine,” matod ni Dominguez. (REV, MVI, Sunstar Philippines)


Source: Sun.Star Superbalita (https://www.sunstar.com.ph/article/1865512/Superbalita-Cebu/Balita/Mga-durugista-di-bakunahan?ref=rss&format=simple&link=link)

No comments