Recent Posts

Breaking News

Mama patay, 2 ka anak angol sa sunog sa Olango


WA NA matabang pa sa iyang pamilya ang 87 anyos nga tiguwang babaye nga namatay sa pagkasunog sa iyang balay sa Miyerkules sa ala 1:15 sa hapon, Agusto 19, 2020 sa sityo Day-as Ibabaw, Barangay Tingo, Isla sa Olango, Dakbayan sa Lapu-Lapu.

Iyang duha ka mga anak nangaangol usab sa pagluwas unta kaniya, usa niini nakaangkon og grabeng mga paso sa lawas.

Ang biktima giila ni SFO1 Hadji Samonte, imbestigador sa Lapu-Lapu District Fire nga si Primitiva DaƱo Taneo, kinsa paig na nilang nakaplagan.

Ang nangaangol giilang sila si Narcisa Taneo, 55 ug iyang lalakeng manghod nga si Antonio Taneo, 46.

Si Narcisa nakaangkon og third degree burns samtang si Antonio dunay first degree burns.

Ang balay nga nasunog gama sa light materials hinungdan nga daling nakadako ang kayo.

Sa interbyu sa Superbalita Cebu, si Samonte niingon nga posibleng kandila nga natumba ang hinungdan sa sunog.

Si Samonte niingon nga nabatasan na ni Primitiva nga mangadye kanunay base sa sulti sa iyang mga anak.

Matag ampo, magdagkot si Primitiva og kandila nga usahay makalimtan sa pagpawong.

“Ang iyang mga anak niingon nga kadaghan na sila makakita og mga sunog sa sawog agi sa kandila,” asoy ni Samonte.

Nagtuo ang banay nga human sa pagpangadye, nakatug si Primitiva ug nalimtan pagpawong ang kandila.

Si Primitiva giingon nga hanap na og panan-aw.

“Duda ang mga anak nga ang ilang mama nakatug,” matod ni Samonte.

Sa pag-ulbo sa kayo, si Narcisa didto sa ilang umahan mga 50 metros gikan sa balay.

Gisuwayan pagluwas ni Narcisa ang iyang inahan, apan pakyas siya.

Matod ni Samonte nga 50.5 porsyento sa “total body surface area” ni Narcisa ang nangapaso.

Duna siyay mga paso sa nawong, dughan, likod, bukton ug lapa-lapa.

Niadto sang higayuna, si Elizabeth, laing anak nga nagpuyo tupad sa balay sa iyang inahan, natug usab niadtong higayuna.

Dako na ang kayo dihang nahigmata siya sa siyagit sa ilang mga silingan.

Nagtuo si Samonte nga si Antonio niluwas sa iyang igsuon gikan sa nagdilaab nga kayo hinungdan nga napaso.

Ang magsuong Taneo toa ra sa ospital sa Olango tungod sa kabalaka nga kon dad-on sa mainland, hayan matakdan og coronavirus disease.

Si Samonte niingon nga nagping-it sa mga paso si Primitiva dihang ilang gisusi sa ospital samtang si Antonio gamay ra kaayog mga paso.

Matod niya nga kon wa pa si Antonio hayan maapil usab si Narcisa sa sunog. (REV)


Source: Sun.Star Superbalita (https://www.sunstar.com.ph/article/1867512/Superbalita-Cebu/Balita/Mama-patay-2-ka-anak-angol-sa-sunog-sa-Olango?ref=rss&format=simple&link=link)

No comments