Recent Posts

Breaking News

Lapu-Lapu City andam na alang sa MGCQ status


GIBUTYAG ni Lapu-Lapu City Mayor Junard Chan nga andam na sa transition ang dakbayan alang sa modified general community quarantine (MGCQ) gikan sa kasamtangang general community quarantine GCQ.

Kini kun ugaling mao kini ang hukom nga makab-ot sa Inter Agency Task Force (IATF) nga estado sa dakbayan karong Agusto 16, Dominggo.

Sumala sa mayor makita man usab sa datos sa kagamhanan nga hinayhinay na nga mikunhod ang kaso sa dakbayan nga resulta sa ilang subsob nga pagpahigayon og contact tracing aron malain ang mga tawo nga dunay coronavirus disease (Covid-19).

Nakita usab nga nag-edukar na ang katawhan kalabot sa Covid-19 kay kadaghanan magsul-ob na og face mask ug modistansya sa daghang tawo.

Bisan pa niini magpadayon gihapon ang mga pulong-pulong ug rekoreda kalabot sa lagda sa kagamhanan aron masigurong dili mobalik sa naandang normal ang katawhan.

“For the month of August makita nimo nga dako kaayo ang deperensya mas daghan ang atong recoveries sa new cases so it’s a good sign and hope we can maintain this in fact naay mga kaso nato nga single digit na lang niay 6 cases, 5 cases, 10 cases pwera buyag pwerti gyud nindota di nata gusto mobalik pa atong maabot nga tag 50, 70, 90 ang adlaw sa kaso,” matod ni Chan.

Nunot sa posibleng pagpaubos sa MGCQ sa kagamhanan gipangandaman na usab ang pagbangon sa turismo sa dakbayan.

Ang Lapu-Lapu City Tourism Cultural & Historical Affairs Commission TCHAC nibisita sa mga resort sa dakbayan niadtong Agusto 5-12 aron masigurong andam na sila sa ipatumang mga health protocol alang sa pagbukas sa turismo sa kagamhanan.

Ang uban nga kinahanglan pa og improvement sa assessment sa TCHAC gihatagan og mga giya sa angayan pang ipatuman sa mga sanitary inspector ug city health officials nga uban sa TCHAC.

Gipangunayan ni Cindi King-Chan, pangulo sa TCHAC, ang paglibot sa mga resort sa siyudad uban ni Grace Mary Chan-Carungay sa City Health Office ug Sanitary Inspector Ferdinand Tepait.

“We look forward to opening up the domestic tourism market to revive the hospitality industry,” matod ni King-Chan sa Superbalita Cebu. (GCM)


Source: Sun.Star Superbalita (https://www.sunstar.com.ph/article/1866744/Superbalita-Cebu/Balita/Lapu-Lapu-City-andam-na-alang-sa-MGCQ-status?ref=rss&format=simple&link=link)

No comments