Recent Posts

Breaking News

Krimen sa Lapu mikunhod


NIKUNHOD ngadto sa 50 porsiyento ang krimen sa dakbayan sud sa 5 ka buwan human nga gipaubos sa community quarantine, sigun sa monitoring sa Lapu-Lapu City Police Office (LLCPO)..

Gibutyag ni Police Colonel Clarito Baja, hepe sa LLCPO, nga mao kini ang resulta sa estriktong pagbantay sa kapulisan sa kadalanan labi na ang padayong pagmuntar ug checkpoints.

Karon nga gipaubos gihapon sa general community quarantine (GCQ) ang dakbayan, dugang opisyal, hayan walay rason nga dili magpadayon ang ilang gipatumang mga lagda ug protocol.

Kasagaran sa ilang mga masikop karon, sumala ni Baja, mao ang quarantine violators ug panagsa na lang ang may kalabotan sa krimen.

Bisan pa niiini dili na usab ingon ana na kadaghan ang quarantine violators itandi niadtong mga miaging buwan nga bag-o pa nga gipaubos sa quarantine ang dakbayan.

Giklaro ni Baja nga mag-agad ra usab ang LCPO sa mando kalabot sa ilang pagbantay sa dakbayan ubos sa quarantine procedures sanglit mao kini ang ilang mandato.

“Karon makadakop na lang ta og 10 usahay. Di pareha sauna nga kaabot og 50. Manghinaot ta nga makat-on na ang mga tawo ug magpadayon ang ilang disiplina hangtod dili na ta mag GCQ ug mag new normal na,” matod ni Baja. (GCM)


Source: Sun.Star Superbalita (https://www.sunstar.com.ph/article/1867255/Superbalita-Cebu/Balita/Krimen-sa-Lapu-mikunhod?ref=rss&format=simple&link=link)

No comments