Recent Posts

Breaking News

Kapitan sa Tipolo, bana patay tungod sa Covid-19


MASULUB-ON nga mipahibawo ang mga kawani sa Barangay Tipolo, Mandaue City nga mitaliwan na si Barangay Kapitan Romana Villanueva-Cuizon kagahapon sa hapon, Agusto 17, 2020.

Gawas sa kapitana, gipahibalo usab nga ang iyang bana nga konsehal sa barangay nga si Benito Cuizon unang nitaliwan, duha na ka semana ang milabay.

Isip pagpadayag sa pagkasubo sa baranagy, gi-half-mast ang bandila sa barangay hall.

Daghang mga higala ang nipadayag sa ilang pagkasubo sa balita ug miduyog sa pamilyang Cuizon sa pagbangotan.

Sa pakighinabi sa Superbalita Cebu ni Mandaue City Councilor Nerissa Soon-Ruiz, nga usa sa mga higala ni Cuizon, nikompirma nga ang magtiyaon pulos nagpositibo sa coronavirus disease (Covid-19) tulo ka semana ang milabay.

Ang magtiyaon na-admit sa usa ka pribadong ospital sa dakbayan sa Mandaue apan, sa katapusang semana sa Hulyo, nitaliwan na si Benito.

Sigon ni Ruiz, nga tungod sa pasyon ni Cuizon nga moserbisyo gikan sa pagkamaestra ngadto sa pagkakapitana diin mosulod sa kada sitio sa barangay aron pag-apud-apod sa ayuda, natakdan siya ug ang iyang bana sa Covid-19.

Ang magtiayon puro na senior citizens ug adunay laing gipamati nga sakit.

Human sa pipila ka semana nga pakigkumbati ni Romana, nagnegatibo na siya sa maong virus ug gibalhin siya sa regular ICU sa usa ka pribadong ospital sa Cebu City.

Apan, tungod sa mga komplikasyon sa iyang baga ug sa iyang kidney, mao kini ang hinungdan sa pagkalas sa iyang kinabuhi.

Nasayangan si Ruiz ni Romana, tungod siya usa ka maayong tawo, maduolan ni bisan kinsa ug usa ka maayong lider alang sa iyang barangay.

Dugang niya nga nag-ampo nalang saiya alang sa pamilya ug ang kalag sa magtiyaon.

Sa Facebook post ni Sixth District Congresswoman Emmarie Ouano-Dizon, nga saludo siya sa pasyon sa pagserbisyo ni Romana sa iyang mga konstituwente.

Dugang ni Dizon nga daghan nang mga kinabuhi iyang natandog isip usa ka maestra ug kapitana.

Mapasalamaton si Dizon nga nagkaila sila ug nahimong maghigala.

“My sincerest condolences sa tibuok banay sa mga Villanueva ug Cuizon,” sigon ni Dizon.

Sa Facebook post sab ni Mandaue City Mayor Jonas Cortes, mipadangat sab siya sa iyang kasagmuyo sa pagtaliwan ni Romana sa laing kinabuhi.

“Thank you for your sincere service and love to the Tipolohanon’s. You will always be remembered especially by all those you have helped and those lives you have changed by your love and care, from being a teacher, a councilor and a Barangay Captain,” sigon Cortes.

“We may have lost a servant leader but heaven has certainly gained another angel,” dugang ni Cortes. (KFD)


Source: Sun.Star Superbalita (https://www.sunstar.com.ph/article/1867256/Superbalita-Cebu/Balita/Kapitan-sa-Tipolo-bana-patay-tungod-sa-Covid-19?ref=rss&format=simple&link=link)

No comments