Recent Posts

Breaking News

Kapitan mihimakak nga nagpabayad sa Angkas card


Gihimakak ni Barangay Ibo Kapitan Mary Jane Cahilog nga iyang gipabayran ang paglukat og certificate sa iyang mga konstituwenti nga buot magpa backride sa ilang motorsiklo.

Kini human nga mipadayag si Lapu-Lapu City Mayor Junard Chan nga nakadawat siya og reklamo gikan sa usa ka Oponganon kalabot niini.

Gani aduna pay mipadala kaniya og resibo nga P130 ang lukat sa naasoyng certificate.

Ang pagpabayad wa ikahimuot sa mayor sanglit anaa pa karon ang dakbayan sa pandemya.

Ang mga motorista usab nga magpa backride gitagaan og Angkas card sa Kagamhanan apan adto ko kini sa city hall kuhaon, di sa barangay.

“Tanan gani nato residente pa swab test wa tay gipabayad kay ang tanan naglisod. So, I don’t know ngano moisyu sila og certification for backriders nga pabayran og P130?,” matod ni Chan.

Apan matod ni Cahilog nga di pagpabayad sa certificate aron makapa backride ang iyang gi-isyu sa mikuha kaniya og certificate sa barangay.

Kon di, certificate kini sa barangay nga nagmatuod nga ang usa ka residente nila live-in o nagpuyo og usa ka balay nga maoy himuong basehan aron makapa backride sa motorsiklo.

Ubos sa ilang barangay ordinance, P130 ang paglukat niini og certificate ug abli na usab ang ekonomiya sa dakbayan.

P100 ang lukat samtang ang P30 alang sa Bureau of Internal Revenue (BIR).

Labaw nga wa usab siya masayod nga ang iya diay gitagaan og certificate di diay gamiton sa dakbayan kon di alang sa ilang pagbiyahe sa Cebu City.

Gumikan niini iya nang giundang una ang pag-isyu aron kalikayan ang kalibog kalabot niini basta dili mosulti para asa nga dapit gamiton.

Moabot sa 11 ka certificate ang naisyu ni Cahilog sa iyang mga konstituwenti.

“Mao man guy ingon sa checkpoint sa Cebu City nga adto sa barangay pagkuha og certificate mao diri sad sa akoa nagkuha. Pero dili man diay to para diri (Lapu-Lapu), para man diay Cebu City. Mao wala sad ko ma inform daan. So karon, og para diri ra, adto na lang mo coordinate sa City Government,” matod ni Cahilog. / GCM


Source: Sun.Star Superbalita (https://www.sunstar.com.ph/article/1866993/Superbalita-Cebu/Balita/Kapitan-mihimakak-nga-nagpabayad-sa-Angkas-card?ref=rss&format=simple&link=link)

No comments