Recent Posts

Breaking News

Kanhi pulis sa Cebu City gi-ambush, patay


(UPDATED) Retiradong pulis nga kanhi sakop sa Cebu City Police Office (CCPO) wa na maka survive sa laing ambush sa Biyernes sa alas 6:20 sa buntag, Agusto 21, 2020, sa Purok 3 Valenzuela, Barangay Poblacion, Panglao, Bohol.

Si Police Lieutenant Amelito Melloria, hepe sa Panglao police, miila sa biktima nga si kanhi PO3 Ramon Bolongaita, kinsa namatay diha-diha.

Si Bolongaita nagsakay og biseklita dihang gipusil sa wa pa mailhing gunman. Si Bolongaita nga dunay samad pinusilan sa ulo namatay diha-diha.

Matod ni Melloria nga naandan na ni Bolongaita nga magbiseklita kada buntag sa dapit.

Tungod kay sayo pa sa buntag, way nakakita sa pagpusil hinungdan nga wa silay nasayran kon pila ang gunman.

Nangita pa sila og close circuit television (CCTV) sa dapit nga hayan nakakuhag footage sa ambush.

Ang mga imbestigador toa pa sa crime scene sa pagsuwat ning taho.

Si Bolongaita naangol sa usa ka ambush sa Nivel Hills, Barangay Busay, Dakbayan sa Sugbo niadtong Agusto 4, 2015.

Wa pa matino ang motibo sa pag-ambush ni Bolongaita niadtong higayuna samtang siya sakop pa sa CCPO.

Si Bolongaita gikataho nga ni-retire sa serbisyo niadtong 2016. (GPL)


Source: Sun.Star Superbalita (https://www.sunstar.com.ph/article/1867677/Superbalita-Cebu/Balita/Kanhi-pulis-sa-Cebu-City-gi-ambush-patay?ref=rss&format=simple&link=link)

No comments