Recent Posts

Breaking News

Inadlaw nga kaso sa Covid sa Cebu City padung mo-flat


TALIWA sa ubos nga gidaghanon sa bag-ong mga kaso sa Covid-19 nga natala sa Dakbayan sa Sugbo sa duha ka mga semana, ang Department of Health (DOH) 7 niingon nga ang Siyudad padung na ngadto sa pag-flat sa iyang curve sa coronavirus disease 2019 (Covid-19).

Si Dr. Mary Jean Loreche, DOH 7 spokesperson for Covid-19, niingon nga gikan sa Agusto 1 ngadto sa 19, 2020, ang inadlaw nga average sa bag-ong mga kaso sa Covid-19 Cebu City naa na lang sa 23 matag adlaw.

Niadtong Agusto 17, ang Cebu City duna lay pito ka bag-ong mga kaso samtang dunay 21 ug walo ka mga kaso sa Agusto 18 ug 19.

“If we look at the two weeks (data) na meron tayo, comparing this to the previous months, medyo bumababa na. So, our curve may be a little bit lesser. So, this is already towards the flattening of the curve for the past two weeks kung i-apply natin yan,” sulti niya sa SunStar Cebu.

Samtang sa pikas bahin, ang inadlaw nga bag-ong mga kaso sa Lalawigan sa Sugbo, matod niya, naa sa 27.4. Iya usab nga nabantayan ang pagminos sa mga kaso sa Dakbayan sa Mandaue ug Lapu-Lapu City.

Sa Agusto 19, ang DOH 7 nakatala og bag-ong mga kaso sa rehiyon. Ang 21 sa Lalawigan sa Sugbo; 10 sa Dakbayan sa Mandaue; 18 sa Lapu-Lapu City; walo sa Cebu City; lima sa Minglanilla; tulo sa Talisay City; usa sa Consolacion; ug tulo sa Negros Oriental.

Bisan sa statistics karon nga dunay maayong kalambuan, matod ni Loreche nga di angay mokompyansa ang publiko kay basin mobalik sa pagsaka.

TUN-AN OG MAAYO

Kon paubsan man ang quarantine level sa Dakbayan sa Sugbo, kinahanglan pa nga tun-an og maayo bisan nagkagamay ang mga kaso sa Covid-19.

Matod ni Police Brigadier General Albert Ignatius Ferro hepe sa Police Regional Office (PRO- 7) ug commander sa Regional Joint Task Force-Central Visayas COVID Shield, nga kinahanglan nga di mag dali ang mga Sugboanon.

Angay nga sabutan kini pag-ayo sa Inter-Agency Task Force nga maoy nagtan-aw sa sitwasyon sa Covid sa siyudad.

Si Cebu City Mayor Edgardo Labella makigtagbo sa mga negosyante sa Sugbo aron hisgutan ang kahimtang sa dakbayan atol sa general community quarantine (GCQ).

“As part of the policy making body of Inter-Agency Task Force in Cebu, I would really like to come up with a good assessment, come up with a viable recommendation and discuss the pros and cons in lowering the community quarantine status,” matod ni Ferro.

Pasabot sa heneral nga di siya gusto nga mahisama sa nanglabay nga mga buwan diin mibalik ngadto sa enhanced community quarantine ang siyudad sa dihang misaka pa pag ayo ang gidaghanon sa mga nagpositibo sa Covid-19.


Source: Sun.Star Superbalita (https://www.sunstar.com.ph/article/1867631/Superbalita-Cebu/Balita/Inadlaw-nga-kaso-sa-Covid-sa-Cebu-City-padung-mo-flat?ref=rss&format=simple&link=link)

No comments