Recent Posts

Breaking News

Ermita barangay council gipatubag ni Labella kalabot sa tigbakay


PAISPLEKARON ni Mayor Edgardo Labella ang mga opisyal sa Barangay Ermita nganong nahitabo ang tigbakay nga gitapuk-an sa daghang mga tawo nga wa mag-obserbar sa mga health protocol sama sa pagsul-ob og face mask, mag social distancing ug nagtapok na hinuon niadtong Dominggo, Agusto 16, 2020.

Si City Legal Officer Rey Gealon maoy gitahasan ni Labella pagpadala og show cause order ngadto sa barangay council nga gipangulohan ni Kapitan Mark Miral.

“I directed City Attorney Rey Gealon to look into the situation in Ermita because I want him to send a letter or conduct an inquiry and ask the barangay captain to make an explanation of why it happened,” padayag ni Labella.

Si Miral, sa iyang bahin, nagkanayon nga dihang ilang nahibaw-an ang hitabo gumikan sa hulagway nga nakuha sa photographer sa Sunstar Cebu, ila dayon nga giadto ang sityo Panagdait kauban ang mga pulis sa Station 5.

Ang sityo utlanan sa silingang barangay ug nakadakop sila og 10 ka mga tawo sanglit ang uban nialibwag og panagan.

Matod ni Miral nga napasakaan na og kaso sa pulis ang lima o unom ka mga tawo nga ilang nadakpan nga nagbitbit pa og mga manok samtang uban gi-profile sa pulis apan wa pasakahi og kaso sanglit nasuta nga wala silay apil sa tigbakay.

Ang pangulo sa Barangay Ermita nagkanayon nga andam siyang motubag sa show cause order gikan sa City Legal Office uban sa pagbutyag nga wala magpabaya ang iyang barangay niining pandemia.

“Yes. andam ko motubag kay kami sa Barangay Ermita wala gyud mi nagpabaya. In fact, naa mi mga record nga always mi ga roving. Pero ang nahitabo mura og ilaga ug iring. Kon naa ang iring, wala ang ilaga. Pero og naa ang iring, wala ang ilaga. Kami ra ang bantayan ani nila, pero masakpan ra gihapon ni namo sila,” padayag ni Miral.

Matod sa kapitan nga niadtong Abril, nakadakop sab sila og mga tawo nga nagtigbakay uban ang mga manok igtatari gumikan sa ilang gipahigayon nga roving.

Ang mayor, sa iyang bahin, nimando sa barangay officials sa Ermita pag-ila sa ubang mga tawo nga ningtambong sa tigbakay para sa posibleng pagpasaka og tukmang kaso. (PAC)


Source: Sun.Star Superbalita (https://www.sunstar.com.ph/article/1867275/Superbalita-Cebu/Balita/Ermita-barangay-council-gipatubag-ni-Labella-kalabot-sa-tigbakay?ref=rss&format=simple&link=link)

No comments