Recent Posts

Breaking News

DepEd Cebu City wa moabot sa target enrollees


WA NAABOT sa Department of Education (DepEd) sa Cebu City ang ilang target nga numero sa enrollees alang sa school year 2020-2021.

Si DepEd Cebu City Division Superintendent Rhea Mar Angtud niingon atong Hulyo 31, 2020 ang katapusang adlaw sa enrollment.

Matod ni Angtud, adunay natala nga 169,467 ka enrollees.

Sigon niya target nila nga mosaka og dos porsyento ang numero sa enrollees alang sa umaabot nga school year.

Niadtong 2019, ang Cebu City nakatala og 178,000 ka mga estudyante.

Sumala ni Angtud distance learning ang platform nga gamiton karon, alang sa online ug offline, sunod sa mando sa national government.

“Distance learning ato platform, online ug offline meaning virtual and printed modules,” dugang ni Angtud.

Matod niya, ang modules alang sa first quarter sa klase kay naa na sa Learning Resource Portals ug mamahimo ng i-download sa mga magtutudlo.

Nahuman na sad ang dry run sa online platform diin ang mga problema nga naagian kay gikolekta na sa staff sa DepEd, matod ni Angtud.

Alang sa printed modules, plano ni Angtud nga makompleto na kini sa Agusto 15.

Niangkon sab si Angtud nga adunay mga hagit nga maagian sa pag-implementar niining bag-ong platform sa klase.

“This is something wala pa ta kasulay so as to readiness, we are ready as far as what we anticipated it to be,” dason ni Angtud.

“Although we really cannot say in all honesty that it will be perfect,” dugang niya.

Nasayran nga daghang gma ginikanan nga nabalaka sa ilang anak nga matakdan og Covid-19 samtang, wala usab kaayo makauyon sa online nga pamaagi. (JJL)


Source: Sun.Star Superbalita (https://www.sunstar.com.ph/article/1865685/Superbalita-Cebu/Balita/DepEd-Cebu-City-wa-moabot-sa-target-enrollees?ref=rss&format=simple&link=link)

No comments