Recent Posts

Breaking News

Covid-19 nanakod na sa trabahoan


ANG pagpanakod sa Covid-19 naa na sa mga trabahoan sud na sa pipila ka mga adlaw nga nakalabay samtang ang Cebu City ubos sa general community quarantine (GCQ).

Mao kini ang gibutyag ni retired Major General Melquiades Feliciano, deputy chief implementer sa Inter Agency Task Force, atol sa interview sa SunStar journalists sa Martes, Agusto 18, 2020, sa Emergency Operations Center (EOC).

Si Feliciano niingon nga kining coronavirus disease 2019 (Covid-19) infections base sa ilang nakuha nga datus gikan sa Agusto 12 ngadto sa 17.

Apan ila pang gitino og maayo kon ang pagpanakod gikan ba sa balay ug nadala ngadto sa trabahoan o gikan sa trabahoan ngadto sa balay.

Matod ni Feliciano nga 60 porsyento sa mga pagpanakod sa mao nga mga petsa naa sa mga trabahoan taliwa sa pagbukas na sa mas daghang mga industriya.

“With the increase of movement, there is now a transmission that we were able to determine through our daily activities of contact tracing which is now in the workplace,” matod ni Feliciano.

Matod niya nga niadtong panahon sa enhanced community quarantine (ECQ) ug modified ECQ, naa lang sa mga panimalay ang mga pagpanakod kay ang mga tawo naa ra sa sulod, apan karon nga gilugakan na ug nahibalik ang daghang mga trabaho, nausab na ang dagan.

Wa siya mohatag og tukmang gidaghanon, apan sa nakalabay nga mga adlaw hangtod niadtong Lunes, 60 porsyento sa mga kaso naa sa trabahoan ningtumaw.

Alang kanila, bag-o kining hagit sa EOC kay ang ilang giatubang karon mao ang “moving target” nga Covid-19 infections tungod sa pagbukas na sa ekonomiya ug pagpanggawas sa mga tawo aron manarbaho.

“Workplace transmission is higher than the household tranmission,” dugang ni Feliciano.

Iyang gipasalig nga kontrolado gihapon nila ang sitwasyon. Gani, nag-average na lang sa 20 ka mga kaso matag adlaw ang ilang natala, labing ubos niadtong Lunes, Agusto 17, pito ra ang ilang natala sukad nag-GCQ ang Cebu City sugod niadtong Agusto 1.

UNSAY GIBUHAT

Aron ilang mapugngan ang pagpanakod sa Sars-Cov-2, kagaw nga maoy hinungdan sa Covid-19, sulod sa mga buhata, nakigtambayayong karon sila sa sektor sa patigayon nga maoy ilang gitutokan karon pag-ayo sa nakalabay nga duha ka mga semana.

Ilang gipakitambayayungan ang Cebu Chamber of Commerce (CCCI) ug uban pang mga miyembro ug naumol og mga pamaagi aron himuong mas luwas ang ilang mga establisemento alang sa mga trabahante ug kustomer pinaagi sa pagsunod sa mga health protocol.

Nag-umol na usab sila og mga pamaagi aron makitambayayong sa gagmay nga mga negusyo, ubos sa pag-abag sa mga buhatan sa Cebu City Government alang sa pagpakatap sa mga kasayuran kalabot sa mga health protocol ug unsay buhaton kon dunay matakdan sa sakit.

Apil sa mga lakang ang pag-lockdown sa tibuok building o sa usa ka floor diin ang kawani nagtrabaho.

Si Feliciano nitumbok sa nahitabo sa usa ka hotel sa Dakbayan sa Sugbo nga ilang gi-lockdown tungod sa pagpasulod og mga tawo nga positibo sa Covid-19 nga ilang nasuta pinaagi sa contact tracing.

“Like BPO staff and of course there was transmission within the floor they occupy, so we locked down the whole floor,” dugang ni Feliciano.

Human niini, gikinahanglan nga i-decontaminate sa management ang tibuok dapit agi og pagtuman sa tanang mga rekisitos nga gilatid sa City Health Department aron malikayan ang pagpanakod sa nasakit sa Covid-19.

Ang dagko usab nga mga negusyo nag-umol og ilang contact tracing teams isip lakang batok sa Covid-19.

FLAT NA

Gibutyag usab ni Feliciano nga base sa datus sa nanglabay nga mga adlaw, ni-flat na ang curve sa gidaghanon sa mga nangatakdan sa Covid-19 matag adlaw.

Karon, mag-average na lang sa 20 ka kaso sa infections matag adlaw, ubos kaayo itandi niadtong tunga-tunga sa Hunyo ngadto sa tunga-tunga sa Hulyo, diin moabot usahay og 100 kapin ka mga kaso ang matala.

Ang gidaghanon sa nangamatay miubos na usab og usa ngadto sa duha matag adlaw, nga ubos gihapon itandi sa Hunyo ngadto sa Hulyo nga dunay average nga 11-12 ka mga pasyente ang nangamatay.

Bisan ang mga ospital nakaginhawa na karong mga panahuna kay naa na lang sa 29 porsyento ang nagamit nga Covid beds nga ubos usab itandi sa milabay nga duha ka mga buwan nga dunay higayon nga niabot og 90 porsyento ang nagamit.

Alang niya, kon basehan ang bag-ong data, andam na kaayo ang Cebu City sa MECQ, apan mapanagan-on siya sa pagrekomendar alang niini.


Source: Sun.Star Superbalita (https://www.sunstar.com.ph/article/1867414/Superbalita-Cebu/Balita/Covid-19-nanakod-na-sa-trabahoan?ref=rss&format=simple&link=link)

No comments