Recent Posts

Breaking News

Computer sets ibutang sa matag tunghaang publiko sa Lapu-Lapu


ISIP suporta sa kagamhanan sa dakbayan sa Lapu-Lapu alang sa Department of Education (DepEd), mohatag kini og computer sets sa matag publikong tunghaan sa dakbayan aron libre nga magamit sa mga tinun-an.

Mao kini ang gipahibalo ni Mayor Junard Chan nga iyang plano samtang nagkaduol ang pag-abli sa school year (SY) 2020-2021 karong Agusto 24, Lunes.

Apan wala pa gibutyag ni Chan kon pila ang kinatibuk-ang budget alang sa computer sets ug asa nga pundo kini kuhaon.

Nasayod ang mayor nga dakong hagit sa DepEd mao ang paghatag og kahimanan sa mga tunghaan subay sa abg-ong online ug modular nga pamaagi nga edukasyon.

Dugang ni Chan, ang computer sets ipahimutang sa matag tunghaan sa usa ka barangay aron masigurong dili na moadto og layo ang usa ka tinun-an aron mogamit sa computer sa ilang pag-research o pag-print sa ilang materyal sa pagtuon.

Nasayran ni Chan nga kasagaran sa mga Grade 11 ug 12 nga mga tinun-an sa nagsingabot nga school year dagan kaayong research works hinungdan nga kinahanglanon ang paggamit og computer.

Apan kasagaran sa mga ginikanan sa mga bata gili makasugakod sa pagpalit og laptop o computer set hinungdan nga nakita sa kagamhanan sa dakbayan ang dakong panginahanglan sa mga tinun-an.

Duhang ni Chan, tagaan usab ang mga tinun-an og face mask sa lokal nga kagamhanan.

Sa paglikay nga dili masupak ang physical distancing, dason ni Chan, kontrolahon sa kagamhanan nga 10 lang ka tinun-an ang mogamit sa pag-research sa usa ka higayon ug kini ipaubos sa sistema nga dunay schedule nga sundon aron paghatag og higayon sa tanan.

Gawas sa computer sets, gipahibawo sa kagamhanan nga libre ang modules sa mga tinun-an gikan sa kindergarten hangtod sa Grade 12 ug ila kining giabaga.

“Like for example sa Marigondon duna na silay 350 ka estudyante, ato butangan ug 350 ka computer aron masiguro nga adto ra gyud ang mga estudyante ug dili na magtuyok-tuyok ug laing barangay,” matod ni Chan.

Nalangay ang pag-abli sa klase imbes sa naandan nga Hunyo matag tuig tungod sa Cvid-19 crisis nga dakong risyo sa kabataan.

Ang DepEd napugos sa hingpit nga pagpatuman sa digital nga sistema sa pag-abli sa tingtungha aron malikay ang panagduol kaayo sa mga bata o pag-obserbar sa physical distancing ug pagsunod sa ubang nalatid sa protocol sa panglawas. / GCM


Source: Sun.Star Superbalita (https://www.sunstar.com.ph/article/1866870/Superbalita-Cebu/Balita/Computer-sets-ibutang-sa-matag-tunghaang-publiko-sa-Lapu-Lapu?ref=rss&format=simple&link=link)

No comments