Recent Posts

Breaking News

Cebu gahinan sa Russia og anti Covid vaccine


GIHATAGAN og kasigurohan ang Dakbayan sa Sugbo ni Russian Ambassador to the Philippines, Igor Anatolyevich Khovaev, nga magahinan og bakuna batok sa coronavirus disease 2019 (Covid-19) kon maandam na kini sa ilang nasod.

Si Mayor Edgardo Labella miasoy sa Superbalita Cebu nga sila personal nga nagkahinabi ug nagbayloay og mensahe ni Khovaev alang sa maong katuyoan aron masiguro ang kaluwasan sa libuan ka mga pamilyang Sugbuanon.

Human nahibawo si Labella nga nakig-alayon usab ang national government pinaagi kang Presidente Rodrigo Duterte tali sa gobyerno sa Russia, ang mayor nipadala usab og komunikasyon kang Khovaev nga nahimo niyang higala.

“Good a.m. Ambassador Igor. Let me express my thanks and sincerest gratitude for your country’s concern to us Filipinos in offering Covid-19 vaccine to us. God bless, Sir. This is Mayor Edgar Labella of Cebu City,” ang mensahe nga gipadala sa mayor.

Gitug-an ni Labella nga nakadawat siya og reply gikan ni Khovaev, kinsa nisaad kaniya nga maapil ang Sugbo sa ilang gi-develop karon nga bakuna.

“Dear Mr. Mayor, good morning. Thank you for your attention. Our common enemy (COVID-19) can be defeated only if all of us combine efforts. Stay safe and healthy. God bless!,” matod ni Khovaev sa iyang tubag.

Si Labella, sa miaging semana, nipahibawo nga ang Siyudad sa Sugbo mogahin og pundo aron pagpalit og bakuna batok sa Covid-19.

Iya kining gihimo human siya masayod nga di maabaga sa nasudnong kagamhanan ang pagbakuna sa tanang mga lumolupyo sa nasod.

Sa 900,000 kapin ka mga lumolupyo sa siyudad, naa lang sa 200,000 ang makaya sa nasudnong kagamhanan nga magastuhan sa bakuna.

Busa, matod ni Labella, nga ang Siyudad mogahin og budget aron ang tanang mga lumolupyo sa siyudad mabakunahan.

Sa talaan sa Department of Health (DOH 7), ang Cebu City adunay 23 ka bag-ong kaso ug 53 ang nangaayo sa Covid sa Agusto 11 nga talaan.

GIPANEGURO

Si Russian President Vladimir Putin sa Agusto 11 namahayag nga girehistro na sa iyang nasod ang Covid-19 vaccine nga gi-develop sa Gamaleya Institute sa Moscow nga ilang gitawag og Sputnik 5 o Gam-Covid-Vac.

Usa sa iyang mga anak nga babaye gibakunahan ug maayo ra ang kahimtang.

Matod ni Putin nga luwas ug epektibo ang ilang bakuna.

Apan bisan ang mga Russian nga sayantipiko ug sa ubang bahin sa kalibutan, mapanagan-on kaayo.

Sa usa ka bakuna nga makonsiderar nga luwas, kinahanglang moagi kini og tulo ka phases sa human trial.

Matod sa World Health Organization (WHO), ang Russian nga bakuna naa pa sa phase 1 sa human trial.

Gikinahanglang moagi kini sa phases 2 ug 3.

Si Presidente Rodrigo Duterte una nang nipadayag nga andam siyang magpabakuna kon ang Russian vaccine moabot dinhi sa nasod.

“Ako, pagdating ng bakuna, in public, para walang satsat d’yan, in public, magpa-injection ako. Ako yung maunang ma-eksperimentuhan. Okay para sa akin,” matod ni Duterte.


Source: Sun.Star Superbalita (https://www.sunstar.com.ph/article/1866763/Superbalita-Cebu/Balita/Cebu-gahinan-sa-Russia-og-anti-Covid-vaccine?ref=rss&format=simple&link=link)

No comments