Recent Posts

Breaking News

Cebu City ipabiling GCQ sa Agusto 16


BISAN pa kon nag-anam na og kunhod ang kaso sa coronavirus disease sa dakbayan sa Sugbo, apan buot ni Mayor Edgardo Labella nga ipabilin sa general community quarantine (GCQ) ang siyudad, sugod Agusto 16.

Kini maoy gibutyag ni Labella atol sa gipahigayon nga sendoff ceremony sa 151 ka sakop sa Special Action Force (SAF) nga mibalik na sa kaulohan.

“We will be happy if there is going to be a downgrade to modified general community quarantine (MGCQ) but if you ask me, I would rather that we maintain the general community quarantine status because there is a better control of the movement of people,” pasabot sa mayor.

Ang mayor niawhag sa publiko nga magbaton og disiplina sa kaugalingon ug dili mokumpiyansa bisan paman kon GCQ o MGCQ mag-agad sa hukom sa Inter Agency Task Force ( IATF) karong Agusto 15, sanglit iyang gihulagway nga bisan unsa nga quarantine classification sa siyudad, ang virus anaa pa gihapon sa palibot.

Niadtong Agusto 10, base sa talaan sa Department of Health (DOH) 7, ang Cebu City adunay 11 ka kaso sa Covid-19 ug walay gikatahong namatay sa virus. Ang maong talaan maoy labing ubos gikan niadtong Hunyo.

Mipasalamat si Labella ngadto ni Secretary Roy Cimatu, overseer sa IATF-Visayas ug ngadto ni Melquiades Feliciano, deputy chief implementer sa IATF-Viasayas, gumikan sa ilang giya nga gihatag sa dakbayan.

Ang mayor nagpasalamat sab ilabi na ngadto ni Presidente Rodrigo Duterte kinsa nihatag og igo nga pagtagad ngadto sa mga Sugbuanon aron makontrolar ang pagkatap sa virus.

Si Labella nagkanayon nga 71 porsento na ang recovery rate sa Cebu City human niabot na og 6,895 ang nanga-ayo sa maong sakit. Samtang adunay 1,724 ka pasyente ang padayon pa nga nagpaalim sa maong balatian ug 603 ang nangamatay tungod sa Covid.


Source: Sun.Star Superbalita (https://www.sunstar.com.ph/article/1866671/Superbalita-Cebu/Balita/Cebu-City-ipabiling-GCQ-sa-Agusto-16?ref=rss&format=simple&link=link)

No comments