Recent Posts

Breaking News

Balay-Balay, Tubig-Tubig: International Youth Day


GISAULOG ang International Youth Day sa Agusto 12, Miyerkules, isip pagselebrar sa mga kalampusan ug kontribusyon sa kabataan sa paghulma sa katilingban.

Tataw ang impluwensya sa kabataan sa matag henerasyon sama sa pipila ka national heroes ug mga batan-ong lider lakip na niini ang Kabataan Partylist (KPL) nga gipangulohan ni Representative Sarah Elago nga nag-inusarang representante sa kabatan-unan sa Kongreso ug mga miyembro sa Sangguniang Kabataan (SK) sa matag barangay.

Nahimong tema sa pagsaulog sa maong adlaw karong tuiga ang Youth Engagement for Global Action. Kini nagpasabot nga dili lang kutob ang paglihok sa kabataan sa ilang mga komunidad ug sa mga hisgutanan nga dunay kalimbigatan sa atong nasod.

Matod pa sa United Nations (UN) Department of Economic and Social Affairs, gihimo ang maong tema sa pagsaulog aron i-highlight ang pagpangilabot sa mga kabataan dili lang sa lokal ug national levels lakip na ang mga hisgutanan nga dunay epekto sa tibuok kalibutan.

Dugang pa sa ahensya sa UN nga ang pagsalmot sa kabataan sa maong kalihukan nakatabang sa pagpalig-on sa mga institusyon sa matag nasod.

Gawas sa SK, daghang organisasyon nga naghatag og kahigayunan sa kabataan nga mahimong maayong ehemplo sa katilingban.

Sa mga tunghaan, dunay student councils ug campus press nga maoy tingog sa mga tinun-an ug representante ngadto sa administrayon sa mga unibersidad.

Padayon ang Children’s Legal Bureau (CLB) sa pagpanday sa kabataan pinaagi sa pag-organize sa mga child rights advocates (CRAs). Bisan pa man sa pandemiya, padayon gihapon sila sa pagpadayag sa ilang mga ideya pinaagi sa radio program sa CLB.

“Ang Kabataan Karon” nga madunggan ala una sa hapon (1:00 p.m.) matag Sabado sa DYRF 1215.

Pipila sa mga SK councils diri sa Sugbo wala mahadlok sa pakigbatok sa pagpasar sa Anti-Terror Law nga gikwestyon karon sa Korte Suprema.

Ang CLB, isip myembro sa Alternative Law Groups (ALG), maoy usa sa petitioners batok sa maong balaod.

Dili lang diri sa Pilipinas milanog ang aktibismo sa kabataan. Ang Swedish national nga si Greta Thunberg nga inila sa pagpangampanya nga panalipdan ang kalikupan ug pagresolba sa climate change maoy labing bata nga Person of the Year sa Time Magazine niadtong tuig 2019.

Kadaghanan sa mga lihok protesta sa nagkalainlaing dapit sa kalibutan sama sa Hong Kong ug Estados Unidos gilangkuban sa mga hugpong sa kabataan nga nagtinguhang batukan ang mga kalapasan sa gobyerno ug uban pang mga suliran.

Matod pa sa ahensya sa UN, makatabang ang pagtugot sa kabataan nga moapil sa political mechanisms nga mamenosan ang mga depekto sa usa ka demokrasya. Makatabang ang kabataan sa pagmugna og sustainable policies ug sa pagpalig-on sa pagsalig ngadto sa public institutions sama sa gobyerno.

Mensahe ni UN Secretary General António Guterres ngadto sa kabataan sa International Youth Day mao ang pag-awhag sa mga leaders ug adults sa pagtabang sa kabataan nga matagamtaman nila ang ilang kinabuhi nga luwas, nga dunay dignidad ingon man ang paghatag og mga kahigayunan alang sa ilang paglambo.

Nahimo ang maong hagit nunot sa mga kalisdanan sa nga nasinati sa kabataan labaw na sa mga epekto sa Covid-19 pandemic. Diri sa atong nasod gipatuman ang blended learning isip hulip sa face-to-face classes apan kadaghanan sa mga estudyante maglisod sa pagkat-on tungod kay walay ekipo o hinay ang internet. Duna poy mga kabataan nga nawad-an og mga ginikanan human mipanaw tungod sa sakit nga Covid-19.

Nagpabilin gihapon nga hagit sa kalambuan sa mga kabataan labaw na sa mga batan-ong babaye ang pagpanghimulos kanila pinaagi sa online sexual exploitation of children (OSEC), human trafficking ug uban pang sex crimes.

Bisan pa man sa maong sitwasyon, wala magpakahilom ang kabataan ug andam nga mopadangat sa ilang mga sentimento. Gamit ang ilang kaalam ug tingog, nahimo silang instrumento sa pagpalanog sa ilang mga suliran ug uban pang mga problema nga giatubang sa ubang sektor.

Kinahanglan nga muhimo og dugang commitments ang kagamhanan sa Pilipinas sa pagpalambo sa kabataan agig pagpangandam kanila nga mahimong responsible citizens sa atong nasod.

Pipila sa mga angay buhaton sa gobyerno ang pagpasar ug pagpatuman og mga balaod nga mopanalipod sa kabataan ug pagpalig-on sa mga child protection laws sama sa pag-amyenda sa Anti-Rape Law ug Anti-Trafficking in Persons Act, pagbasura sa planong paubsan ang minimum age of criminal responsibility ngadto sa nueve (9) anyos, pag-improve sa kalidad sa edukasyon sa Pilipinas, paghatag og uban pang assistance alang sa kalambuan sa mga bata, ug pagsiguro nga walay himuong pagpanghulga sa mga kabataan nga dunay kritisismo ngadto sa gobyerno ug mga nagdumala sama na lang sa mga kabataan nga tigsalmot ug mga lihok protesta.

Gikinahanglan ang atong padayon nga pagsuporta sa kabataan labaw na sa panahon sa kalisdanan sama sa pandemiya. Matod pa ni Dr. Jose Rizal: 'Ang kabataan ang pag-asa ng bayan”. Ang kabatan-onan maoy atong yawi nga magmalampuson ang atong katilingban sa umaabot.


Source: Sun.Star Superbalita (https://www.sunstar.com.ph/article/1867362/Superbalita-Cebu/Balita/Balay-Balay-Tubig-Tubig-International-Youth-Day?ref=rss&format=simple&link=link)

No comments