Recent Posts

Breaking News

Balay-Balay, Tubig-Tubig: Ang kabataan sa Sona ni Duterte


GIPASIGARBO ni Presidente Rodrigo Duterte ang mga kalampusan sa iyang administrasyon sa iyang ikalimang State of the Nation Address (Sona) niadtong Hulyo 27, 2020.

Usa sa iyang gihimug-atan sa maong higayon mao ang pagrespetar sa tawhanong katungod ug pagduso sa katungod sa kabataan.

Matod sa pangulo sa nasod, iyang napirmahan ang Executive Order No. 92 nga nagmando sa pagmugna sa National Council Against Child Labor.

Pinaagi sa maong nasudnong konseho, mamenosan ug maglikayan ang pagpanghimulos sa mga bata sa pugos nga pagpanrabaho bisan pa man sa huyang nga pangedaron.

Nahisgutan sab ni Duterte ang pagtungha sa mga pampublikong tunghaan kon diin ipatuman unya sa Department of Education (DepEd) ang online ug odular learning ug paggamit sa telebisyon ug radyo aron mapadayon ang pagkat-on sa mga bata ug kabataan. Wala’y mahitabo nga face-to-face classes samtang wala pay bakuna batok sa Covid-19.

Wala matubag ang pipila ka mga suliran nga giatubang sa kabataan sa dul-an duha ka oras nga Sona ni Duterte.

Gipanawagan karon sa CLB ngadto sa Presidente ug sa Kongreso nga hatagan og pagtagad ang pagpasar sa mga balaudnon nga mupanalipod sa pagpangabuso sa mga bata ug kabataan, labaw na ang online sexual abuse and exploitation of children (Osec).

Bag-o lang nga gisaulog ang World Day Against Trafficking in Persons (WDAT) niadtong Hulyo 30. Bisan pa man sa mga kalambuan sa pakigbatok sa human trafficking ug uban pang mga lakang aron sa pagpanubag sa mga abusado nga akusado, kinahanglan nga butangan og ngipon ang atong mga balaod.

Usa sa mga ebidensya nga duna’y mga kriminal nga padayon sa pagpangbiktima sa mga bata ug kabataan mao ang pagsaka sa mga kaso sa trafficking ug uban pang sex crimes bisan sa pandemiya.

Ang Department of Justice (DOJ) nakadawat og 279,166 ka reports kabahin sa online sexual abuse of children kon itandi sa datos sa miaging tuig nga anaa lang sa 76,561.

Sa wala pa mahitabo ang Covid-19 pandemic, nailhan na ang Pilipinas isip hotspot sa Osec. Nagkahiusa ang mga civil society organizations (CSOs) sa pagtumbok nga ang mga hinungdan sa pagsaka sa mga kaso sa maong krimen ang sayon nga access sa mga langyaw nga makatan-aw sa mga law-ay nga hulagway sa mga bata ug kakuwang sa mga epektibo nga pamaagi sa paglikay nga mahitabo ang Osec.

Ang kakabus maoy nagpabiling hinungdan sa padayon nga pagpangabuso sa mga bata. Labaw na karong pandemiya nga nakaepekto sa panginabuhian sa matag Pilipino, dakong risgo ang giatubang sa mga bata ug kabataan sa pagpanghimulos.

Tungod kay gibarugan sa DepEd ang pagpahigayon sa mga klase bisan pa man nga dunay pandemiya, gipanglantawan nga daghang bata ang ma-expose sa nagkalain-laing porma sa abuso gamit ang internet.

Nasayod kitang tanan nga dili kanunay nga makamonitor ang mga ginikanan sa ilang bata sa paggamit sa internet. Walay igong security and privacy measures ang mga kasamtangang balaod sa pagpanalipod sa mga bata ug kabataan.

Panawagan sa CLB nga makita sa gobyerno lakip na ang Kongreso ug mga lokal nga konseho ang panginahanglan sa pagmugna og ‘responsive child protection strategy’ sa gobyerno nga mutubag sa maong isyu lakip na niini ang pag-usab sa mga balaod sama sa Anti-Rape Law of 1997 ug Anti-Trafficking in Persons Act of 2003.

Kon mapalig-on pa ang atong mga balaod, mohunong na sa pagsiaw ang mga kriminal.

Kinahanglan sab sa mga tigpatuman sa balaod nga mahimong accessible sa pagtubag sa suliran sa mga biktima nga posibleng dunay kalisdanan sa pagsumbong sa mga insidente sa pagpangabuso labaw na nga nagpadayon gihapon ang kwarantina.

[Mahimo nga mopadangat sa inyong mga suliran o pagsumbong sa kaso sa pagpangabuso pinaagi sa email (clbphilscebu@gmail.com) o pag-send og mensahe sa among Facebook page nga ‘Children’s Legal Bureau’ m.me/ChildrensLegalBureauInc (Messenger)]


Source: Sun.Star Superbalita (https://www.sunstar.com.ph/article/1866613/Superbalita-Cebu/Balita/Balay-Balay-Tubig-Tubig-Ang-kabataan-sa-Sona-ni-Duterte?ref=rss&format=simple&link=link)

No comments