Recent Posts

Breaking News

'Bagani' batok insurhensiya


DAVAO OCCIDENTAL -- Pormal nang gisugdan sa 73rd Infantry Battalion (IB) ug 10th Infantry Division (ID) sa Philippine Army (PA) ang pagbansay sa 60 ka mga "Bagani" sa Barangay Datal Anggas ug Barangay Spring, lungsod sa Alabel, Sarangani province niadtong Agosto 18, 2020.

Gibutyag ni Lieutenant Colonel Ronaldo Valdez, pamuno sa 73rd IB, nga usa ka semanang magbansay ang mga Bagani diin usa sa ilang pagatun-an mao ang disiplina sa militar, saktong paggamit og armas ug immediate action drill.

Apil sa ilang lecture mao ang prevention and control batok sa pandemya sa Covid-19, first aid ug backyard gardening.

Sumala ni Valdez nga dako og ikatabang sa komunidad ang mga Bagani sanglit motabang sila pagbantay aron pagsumpo sa insurhensiya.

Magsilbi sab nga 24/7 nga sundalo sa komunidad ang mga Bagani, hinungdan nga dako ang pasalamat sa 73rd IB sa gipakita niining interes sa pakig-alayon kanila.

Nasayran nga ang mga Bagani mao ang grupo sa mga lumad nga boluntaryo nga niapil aron moprotekta sa ilang komunidad batok sa mga teroristang New People's Army nga buot mangilad kanila.

Gidason sa opisyal nga pinaagi sa maong grupo, maglisud na pagsulod ang mga walhong komunista sa ilang komunidad aron magsabwag og kasamok ug mohimo og pagpanglingla aron lang makakuha og bag-ong miyembro. (Orlando B. Dinoy)


Source: Sun.Star Superbalita (https://www.sunstar.com.ph/article/1867692/Superbalita-Davao/Balita/Bagani-batok-insurhensiya?ref=rss&format=simple&link=link)

No comments