Recent Posts

Breaking News

Bag-ong requirement sa LTO magsugod na karon


MAGSUGOD karon, Agusto 3, ang bag-ong pamaagi sa Land Transportation Office (LTO) sa pagkuha sa student permit ug sa driver’s license.

Tungod kay kinahanglan na ang driving course completion certificates gikan sa accredited driving schools.

Lakip sa kinahanglan nga mopaubos sa Theoretical Driving Course ug Practical Driving Course ang mokuha og student permit ug kadtong mga magkuha pa og bag-ong lisensya mapa-professional o non-professional.

Si LTO 7 regional director Victor Caindec nagkanayon nga 23 na ka driving schools ang ilahang na-accredit lukop Central Visayas.

Kon mokuha og student permit, kinahanglan kini mopaubos og 15 ka oras nga Theoretical Driving Course (TDC) isip usa sa mga rekisito.

Sa mga mokuha og bag-o nga driver’s license, parehong professional ug non-professional, kinahanglan kining mopaubos sa Practical Driving Course (PDC).

Samtang kadtong restriction codes, kinahanglan usab sila og PDC.

Kon mahuman kini sa mga course tanang certificates gikan sa DEP Training Centers, i-transmit ra diretso sa LTO susama sa pagkuha sa medical ug drug test isip rekisito sa LTO nga ang testing center na ang mosumiter niini diretso sa ahensiya.

Matod ni Caindec, ang plano nila nga ibalhin ang Cebu City District Office sa N. Bacalso Avenue, gikatakda kini nga ibalhin sa Robinsons Galleria sa dili pa mahuman ang tuig.

Mao na unya kini ang labing dako nga buhatan sa LTO Central Visayas.

Samtang ang buhatan nila sa N. Bacalso himoan kini nila og LTO-run nga accredited driving school.

Ang pag-set up o IT system nalang ang kuwang sa Robinsons aron mamahimong operational na kini.

Lakip sa accredited nga driving schools ang TL Mabuhay Driving Lesson Academy Inc. sa Maguikay, Mandaue; Lawaan 1, Talisay City; Pusok, Lapu-Lapu; Valladolid, Carcar City; S. Osmeña, Toledo City; Taytay, Danao City; Lamac, Consolacion; Poblacion, Medellin; isla sa Camotes; Pahina Central, Cebu City; Balamban; Sta. Fe; Mambaling, Cebu City; ug ang AZ888 Driving School sa Valladolid, Carcar City; Bakilid, Mandaue City; Pajo, Lapu-Lapu City; ug Mambaling, Cebu City.

Samtang sa Negros Oriental, accredited na usab ang driving school sa TL Mabuhay Driving Lesson Academy Inc. sa Taclobo, Dumaguete City; Talungon, Bais City; ug Bayawan.

Samtang sa Bohol ang TL Mabuhay Driving Lesson Academy Inc. driving school sa Poblacion 3, Tagbilaran City; West Canayaon, Garcia Hernandez, ug Talibon gi-accredit na usab sa LTO 7. (HBL)


Source: Sun.Star Superbalita (https://www.sunstar.com.ph/article/1865684/Superbalita-Cebu/Balita/Bag-ong-requirement-sa-LTO-magsugod-na-karon?ref=rss&format=simple&link=link)

No comments