Recent Posts

Breaking News

Asawa sa napatay nga bana mitahan


COTABATO CITY -- Mitahan na ngadto sa mga awtoridad ang asawa nga giingong gitudlo nga maoy utok sa pagpatay sa iyang bana niadtong miaging adlaw sa probinsiya sa Maguindanao.

Ang suspek giila nga si Bainema Ikay, 20, molupyo sa Barangay Tambunan, Guindulungan, sa maong probinsiya.

Gitudlo sa suspek ang iyang ka-relasyon nga si Pogi Ali alyas Pogi nga maoy mipusil sa iyang bana nga si Jameer Ikay.

Matud pa nga nakonsensiya ang suspek sa iyang gihimo, hinungdan nga misurender sa kapulisan sa Datu Odin Sinsuat Municipal Police Station.

Kahinumdoman nga nakaplagan ang patay nga lawas ni Jameer sa maisan sa Barangay Ambolodto, Datu Odin Sinsuat nga dunay samad pinusilan ulo.

Giangkon sumala pa ni Bainema nga ilang giplano sa ka-relasyon nga si alyas Pogi ang pagpatay sa iyang bana aron gawasnon na sila sa ilang relasyon.

Sa wala pa mapatay ang biktima, mitambong pa sila og kanduli (kumbira) sa Barangay Ambolodto ug mismong si alyas Pogi pa ang nagsundo sa mag-asawa sakay sa motorsiklo.

Pag-abot nila sa ngiob nga dapit sa Barangay Ambolodto, didto na gipusil ni alyas Pogi ang biktima tumong sa ulo gamit ang kalibre .45 nga pistola.

Nangayo sab og pasaylo si Bainema sa pamilya sa iyang bana.

Sa pagsuwat ning balita, gipangita pa sa kapulisan si alyas Pogi apan gisang-at na ang kasong pagpatay batok sa mga suspek. (Edgar E. Fuerzas)


Source: Sun.Star Superbalita (https://www.sunstar.com.ph/article/1867474/Superbalita-Davao/Balita/Asawa-sa-napatay-nga-bana-mitahan?ref=rss&format=simple&link=link)

No comments