Recent Posts

Breaking News

Amahan, anak gikilatan samtang nanagat; 1 patay


USA ang patay ug usa angol human maigo sa kilat ang amahan ug anak samtang nanagat mga alas 2 sa kaadlawon sa Miyerkules, Agusto 12, 2020, sa kadagatan sa Sityo Panaguikan, Barangay Tapun, lungsod sa Dalaguete, habagatang Sugbo.

Si Eleuterio Delposo, 62, minyo, taga Barangay Mananggal sa nahisgutang lungsod dead on arrival (DOA) sa tambalanan.

Samtang luwas na sa makuyaw nga kahimtang ang iyang anak nga si Jonathan Delposo, 24, minyo, apan nagsigeg reklamo sa ngulngol sa ubos nga bahin sa iyang lawas.

Si Major Pedy Noval, hepe sa Dalaguete Police Station nga nahinabi sa Superbalita Cebu, nagkanayon nga ang amahan ug anak nanagat sakay sa ilang pumpboat.

Ang anak mibutyag nga samtang sila nanagat, kalit lang silang naigo sa kilat.

Tungod sa kakusog sa kilat, ang iyang amahan nawad-an sa panimuot samtang siya nakabantay sa pagbanhod sa iyang lawas.

Bitbit ang flashlight, nakapangayo siyag panabang sa laing mga mananagat nga sila si Paulino Gamboa, Julius Requina, ug Lorenzo Purgatorio, kinsa way langay gitabang ang mga biktima ug gidala sa daplin sa baybayon ngadto na sa tambalanan.

Apan DOA na si Eleuterio. (GPL)


Source: Sun.Star Superbalita (https://www.sunstar.com.ph/article/1866708/Superbalita-Cebu/Balita/Amahan-anak-gikilatan-samtang-nanagat-1-patay?ref=rss&format=simple&link=link)

No comments