Recent Posts

Breaking News

African Swine Fever kuyanap na sa North Cotabato


KIDAPAWAN CITY -- Mikuyanap na ang African Swine Fever (ASF) sa ubang dapit sa probinsiya sa North Cotabato.

Kini ang gibutyag ni Department of Agriculture (DA)-Soccsksargen Executive Regional Director Arlan Mangelen.

Pinakaulahi nga naigo sa kagaw sa mga binuhing baboy ang Purok 8 ug Purok 9 sa Barangay Poblacion sa President Roxas.

Sumala kang Dr. Rufino Sorupia, nangulo sa Cotabato Provincial Veterinary Office, nga nakapalit og karne sa baboy ang mga molupyo sa maong dapit sa usa ka barangay sa Magpet nga nataptan sab sa ASF.

Gawas sa President Roxas ug Magpet, nataptan na sab ang lungsod sa Arakan sa nahisgutang probinsiya.

Kahinumdoman nga gipangpatay, gisunog ug gilubong ang mga baboy nga kontaminado sa ASF sa Magpet ug nanghatag og hinabang ang DA-Soccsksargen sa mga hog raisers nga grabeng naapektuhan sa kagaw.

Gipahugtan pa sa DA, kauban ang mga sakop sa Cotabato Provincial Veterinary Office, ang mga entry ug exit point sa tulo ka lungsod aron dili na makatabok sa ubang dapit sa probinsiya. (Edgar E. Fuerzas)


Source: Sun.Star Superbalita (https://www.sunstar.com.ph/article/1866757/Superbalita-Davao/Balita/African-Swine-Fever-kuyanap-na-sa-North-Cotabato?ref=rss&format=simple&link=link)

No comments