Recent Posts

Breaking News

6 pa ang mitan-aw sa whale shark


SA 1,000 nga limit sa mga turista alang sa whale shark watching sa lungsod sa Oslob, unom pa lang ka mga turista ang pasiunang ningtan-aw sa mga butanding sa unang adlaw sa pagbukas niini.

Kini maoy gipahibawo ni Mary Rose Buscas, tourism officer sa lungsod sa Agusto 1, 2020.

Pasabot ni Mayor Jose "Jun" Tumulak sa lungsod sa Oslob nga nakasabot siya sa menos nga gidaghanon sa mga turista nga miabot sa lungsod.

Kini gumikan sa padayon nga hulga ug kahadlok sa mga tawo sa pagkatap sa coronavirus disease (Covid-19).

"Ni limit ta og 1,000 pero di pa gyud na maabot kay sa pagkakaron, probinsya pa man gyud sa Sugbo ang maka tan-aw. Gawas kon karon kay nausab naman sad ang status sa Cebu City, open na pod unya ang mga ports ug uban nga province basin makaanhi pod sa atoa," matod ni Tumulak sa Superbalita sa Cebu Agusto 1.

Dugang sa mayor nga madaghan man o menos ang kustomer, padayon nga nagsubay ang lungsod sa kamandoan sa lalawigan labot sa mga health protocol nga angay nga subayon sa mga turista ug establisemento.

Kini sama sa pagpamutang og mga disinfecting equipment, pagpakatap og hand sanitizers ug alcohol ug uban pang paagi nga maluwas sa sakit ang tanan.

RATE MOTAAS

Tungod sa dugang nga pamaagi, gilauman usab ang mas taas nga rate sa whale shark watching.

Matod ni Tumulak nga kaniadto nagtungtong lang sa P500 ang bayran sa mga local tourist samtang P1,000 alang sa mga langyaw.

Apan karon P1,000 na sa local tourist samtang P1,500 alang sa mga langyaw.

"Kaniadto mo-average man ang adlaw og 2,000 kapin ang motan-aw pero karon gilimit naman gud nato og 1,000 so mao na nga gipatas-an sad nato ang atong presyo," matod sa mayor.

Hinuon, nalakip sa bayad ang serbisyo, libre nga mga healthy welcome drinks ug uban pa.

Pasidaan sa lungsod nga di sila modawat og walk-in customers. Kinahanglan kini nga mo-book sa online portal sa Kapitolyo aron masusi daan ang gidaghanon sa mosuroy.

Naglaom si Tumulak nga sa mosunod nga mga adlaw mapun-an pa ang mga turista nga moduaw sa lungsod aron ma-experience usab ang maanindot nga talan-awon.

"Ato man gyud na gi implementar ang health protocol. So, moagi gyud na tanan sa health protocol. Unya mao man gyud ang nasabutan. So, mao na ato tumanon. Kami sad sa Oslob naningkamot nga ang atong mga bisita, dili makakuha og sakit sa Oslob.So, mao na nga gamayng pasensya sad kay duna sad usahay malagot sa kalangay pero sa safety ra man sad na," matod ni Tumulak.

Gikataho nga ang mga turista nga miabot sa Oslob mituman sa protocol ug nagdala usab og kaugalingon nga mouthpiece pagpugong sa kagaw sa coronavirus disease (Covid-19). (ANV)


Source: Sun.Star Superbalita (https://www.sunstar.com.ph/article/1865588/Superbalita-Cebu/Balita/6-pa-ang-mitan-aw-sa-whale-shark?ref=rss&format=simple&link=link)

No comments