Recent Posts

Breaking News

3 ka traffic enforcers sa Lapu gipasidunggan


GITAGAAN og pasindungog sa kagamhanan sa dakbayan sa Lapu-Lapu ang tulo ka mga salop sa City Traffic Management System (CTMS) human nag-viral sa social media gumikan sa ilang maayong pagpanerbisyo ug pagpatuman sa lagda sa kadalanan.

Ang traffic enforcers mao sila si Apolinario Taping, Efren Alpanta ug Eddie Gemino.

Ang duha nag-viral sa social media gumikan sa ilang pagsayawsayaw sa kadalanan dihang nagpatunhay sa dagan sa trapiko bisan sa nag-usab-usab ang dagan sa panahon, init ug mokalit og uwan.

Samtang. si Gemino gidayeg human wala mobiya sa iyang pwesto bisan nagbunok ang uwan ug padayong gipahan-ay ang dagan sa trapiko.

Hinuon, nakasul-o kini og raincoat ug boots apan gibahaan na ang iyang gibarogan niadtong tungora nga miabot na sa iyang tuhod.

Si Lapu-Lapu City Mayor Junard Chan maoy nitunol sa tulo sa ilang certificate of commendation ug salapi nga pahalipay.

Gikuha kini gikan sa awards and incentives for service excelllence program sa Office of tha Mayor.

Matod ni Chan nga angayan gayud nga tagaan ug pasidungog ang tulo sanglit sila maoy nagpakita sa maayong gawi sa usa ka public servant.

Sayod siya sa kalisod sa mga traffic enforcer sa ilang trabaho sanglit uwan ug init ang ilang kanunay nga gisagubang.

Wala pay labot niini ang liboan ka motorista nga atubangon kada adlaw diin dili gayud kalikayan nga adunay magpabadlong.

Gipasalamatan usab ni Chan ang pangulo sa CTMS nga si Mario Napule sa maayo niining paggiya sa iyang mga sakop.

Naghinaot siya nga unta magpadayon ang tulo sa ilang maayong panerbisyo ug mahimong ehemplo sa uban nga kung magpakita lang ka ug maayong lihok sa trabaho aduna gayuy mga tawo nga andam modayeg.

“Importante kaayo ang pag man sa trapiko labi na karon nga we are under GCQ daghan ta ug bantayanan, number coding, colorum ug badlongon nga mga motorista apan bisan karon panahon sa ting uwan saludo ko nila kay wala gayud nila biyae ang ilang pwesto para lang mahapsay ang pagdagan sa mga motorista, basta ang gobyerno naglantaw kaninyo sa inyong maayong buhat,” matod ni Chan. (GCM)


Source: Sun.Star Superbalita (https://www.sunstar.com.ph/article/1867626/Superbalita-Cebu/Balita/3-ka-traffic-enforcers-sa-Lapu-gipasidunggan?ref=rss&format=simple&link=link)

No comments