Recent Posts

Breaking News

3 balay gilamoy sa kalayo


NORTH COTABATO -- Naugdaw sa dakong sunog ang tulo ka balay alas 7:10 sa gabii niadtong Huwebes, Agosto 20, 2020, sa siyudad sa Kidapawan.

Sa taho gikan sa City Fire Bureau, nasayran nga nakadawat sila og tawag sa telepono nga dunay dakong sunog sa Sinsuat Street, Barangay Poblacion sa maong siyudad.

Abtik nga nagresponde ang mga bombero sa Bureau of Fire Protection (BFP)-Kidapawan City apan pag-abot nila sa lugar, nagdilaab na ang dakong kalayo.

Nahiabot sab ang ubang bombero gikan sa probinsiya sa North Cotabato nga mitabang sa pagpalong sa sunog.

Human ang kapin usa ka oras, gideklara sa BFP nga fire out na ang sunog ug wala na makatapon sa uban pang mga balay.

Gikompirma ni Purok President Bebot Arroyo nga nagsugod ang kalayo sa balay sa pamilya nga Santos nga gama lang sa kahoy.

Nakatabang sab ang kusog nga ulan, hinungdan nga wala makatapon ang kalayo sa kasikbit nga mga gambalay.

Sa pagsuwat ning balita, gisusi pa sa BFP-Kidapawan City ang hinungdan sa sunog, apil na kantidad sa damyos. (Edgar E. Fuerzas)


Source: Sun.Star Superbalita (https://www.sunstar.com.ph/article/1867691/Superbalita-Davao/Balita/3-balay-gilamoy-sa-kalayo?ref=rss&format=simple&link=link)

No comments