Recent Posts

Breaking News

2 Moro fronts nipirma og kasabutan


KIDAPAWAN CITY -- Milagda og kasabutan niadtong Sabado ang duha ka armadong pundok nga tapuson na ang ilang panagbangi sa giilogan nga yuta sa South Upi, Maguindanao Province.

Gibutyag ni South Upi Mayor Reynalbert Insular nga halos 200 ektaryas nga yuta ang gikabangian sa pipila ka mga kaigsuonang Muslim batok sa mga lumad nga Teduray sa Sitio Bahar, Fomogoyon ug Popo sa Barangay Pandan, utlanan sa Brgy. Pilar sa maong lungsod.

Kahinumdoman nga daghan na nang kinabuhi ang nakalas o naangol gumikan sa katag-katag nga pang-engkuwentro sa maong mga grupo nga giingong pulos sakop sa duha ka giilang Moro fronts sa Mindanao.

Abtik nga mihimo og kongkreto nga lakang si Mayor Insular, uban ang militar, kapulisan, Moro Islamic Liberation Front (MILF), Moro National Liberation Front (MNLF), Muslim elders, non-government organizations (NGOs), mga opisyal sa Bangsamoro Autonomous Region in Muslim Mindanao (BARMM) ug kagamhanang probinsiyal sa Maguindanao nga matapos ang dugay na kaayo nga gubat sa mga molupyo sa magkasikbit nga barangay sa South Upi.

Taas nga proseso ang giagian sa negosasyon una nagkasabot nga tapuson na ang ilang panagbangi.

Gibutyag ni Mayor Insular nga iya na nga napasusi ang yuta nga gi-awayan ug gitakda kining ihatag sa mga tinuod nga nanag-iya.

Mitambong sa paglagda sa kasabutan sa grupo ang mga opisyal sa South Upi, kapulisan, kasundalohan, GPH-MILF CCCH, MAFAR BARMM ug MENRE BARMM, lakip na ang mga sakop sa tri-Media.

Nagpasalig sab ang mga lider sa duha ka grupo nga sundon ang ilang gipirmahan nga kasabutan alang sa kalinaw, panaghiusa ug kalamboan.


Source: Sun.Star Superbalita (https://www.sunstar.com.ph/article/1867194/Superbalita-Davao/Balita/2-Moro-fronts-nipirma-og-kasabutan?ref=rss&format=simple&link=link)

No comments