Recent Posts

Breaking News

12 kilos nga shabu nasakmit; K-9 dogs nakabantay


MOABOT sa 12 ka kilo sa gituohang shabu nga dunay balor nga P81.6 milyones nasakmit sa hiniusa nga operasyon sa Philippine Drug Enforcement (PDEA)-7, Regional Intelligence Division (RID) 7, Regional Drug Enforcement Unit (RDEU) 7 ug Provincial Drug Enforcement Group (PDEG) sa Sabado sa gabii, Agusto 15, 2020 sa Dakbayan sa Sugbo.

Ang drugas gisulod sa usa ka tea bag samtang ang tea bag giputos sa usa ka guma o interior sa ligid nga gibutang sa usa ka led spot light aron pagtago og maayo sa ilegal nga shipment.

Matod ni PDEA-7 Regional Director Levi Ortiz nga upat ka mga interior pack gisudlan og tagtulo ka putos sa illegal drugas. Gisulod kini sa tulo ka mga equipment box, diin kada usa ka box dunay upat ka putos nga gisulod. Ang shipment gikan sa kaulohan.

Ang PDEA nihangyo sa Superbalita Cebu nga pugngan una ang ubang mga mahinungdanon detalye samtang nagpadayon ang ilang imbestigasyon sa pagsuta kinsa ang tag-iya sa shipment.

Nasayran nga ang grupo ni IA 1 Jessie Cabutotan mipahigayon sa ilang regular nga pag-inspeksiyon sa mga shipment nga gipaagi sa courier companies.

Nagduda ang mga operating team dihang ang duha ka mga K-9 dog milingkod sa mga equipment box, timaan nga duna silay nasimhutang illegal drugs.

Ubos sa pakigkooperar sa courier company, gidala sa Pier 3 ang tulo ka mga kahon aron susihon pinaagi sa X-ray machine para masusi.

Didto na nahibaw-an nga ang sulod shabu human giablihan ang usa sa mga kahon aron pagkompirmar. (Benjie B. Talisic)


Source: Sun.Star Superbalita (https://www.sunstar.com.ph/article/1867088/Superbalita-Cebu/Balita/12-kilos-nga-shabu-nasakmit-K-9-dogs-nakabantay?ref=rss&format=simple&link=link)

No comments