Recent Posts

Breaking News

107 hog raisers gitabangan


MAGSAYSAY, Davao del Sur -- Nag-apud-apod og bugas ang Municipal Agriculture Office (MAO) sa lugar alang sa 107 ka mga hog raisers human naapektuhan sa African Swine Fever (ASF) ang ilang mga baboy didto sa Barangay Barayong.

Adlaw’ng Miyerkules, Agosto 19, gipangunahan ni MAO officer Helen Carampatana ang distribusyon sa mga sinakong bugas dungan sa pahimangno nga ipatuman ang biosecurity measures sa lugar.

Sumala ni Carampatana nga mihimo og inisyatibo ang lokal nga gobyerno aron nga matabangan ang mga hog raisers nga nakasinati og financial crisis tungod sa epedemya.

Matud niini nga gihuwat pa nila ang ayudang pinansiyal kantidad P5,000 gikan sa Department of Agriculture (DA) sa matag baboy nga naigo sa culling.

Samtang nagpahimangno si Mayor Arthur Davin sa tanan nilang molupyo nga hugtanong gidili ang pag-ihaw og baboy sa ilang mga balay kung wala kini moagi sa saktong proseso.

Hinuon sumala sa opisyal nga subay sa mandato sa DA tugutan ang pag-ihaw kon matuman ang mga proseso sama sa paghimo og 6-foot deep hole; inspection report gikan sa MAO; ug nakabayad og service fee.

Apan sa mga barangay sa Barayong, Mabini ug Lower Bala, hugtanong gidili gyud ang pag-ihaw sa ilang mga balay mao nga kinahanglang dalhon kini sa slaughterhouse sa Barangay Poblacion.

Padayon ang gihimong inspeksiyon sa mga personahe sa MAO sa mga nagbaboyan diin ipailawom sila sa orientation aron masayod sa mga angay buhaton sa pakigbatok sa ASF.

Nagbahad ang mga toridad sa lugar nga mag-atubang og kasong paglapas sa Republic Act 10356 o Meat Inspection Act ang bisan kinsa nga mosupak ug mobayad og multa.


Source: Sun.Star Superbalita (https://www.sunstar.com.ph/article/1867579/Superbalita-Davao/Balita/107-hog-raisers-gitabangan?ref=rss&format=simple&link=link)

No comments