Recent Posts

Breaking News

Whale shark watching sa Oslob, ubang tourism destination buksan


DI PA uwahi alang sa mga buot nga mag-adventure karon nga gilugakan na ang quarantine level sa Lalawigan Sugbo kay buksan na ang tourism sites alang sa mga kalihukan sa turismo.

Apan kinahanglan nga mahisubay sa estrikto nga health protocol pagsiguro nga luwas ang panglawas sa tanan nga mga tawo nga moduaw sa nagkadaiyang mga dapit.

Kini pipila lang sa nahisgutan atol sa tigom sa mga resort owner, opisyal ug kadagkoan sa Lungsod sa Oslob sa Hulyo 15, 2020.

Ang maong pulong gipangulohan ni Cebu Governor Gwendolyn Garcia.

Alang sa mga naghinamhinam na nga makaligo og dagat, makakita og maanindot nga talan-awon sa Lalawigan sa Sugbo human sa tulo ka buwan nga higpit nga quarantine, mahimo na nga makapahigayon og snorkeling, whale shark watching ug diving subay sa pagpaubos sa Lalawigan sa modified general community quarantine (MGCQ).

Apan tungod sa presensya sa coronavirus disease, gihan-ay pa sa Probinsya ang mga lakang aron mahimong luwas gikan sa kagaw.

Wa pa hinuon maghisgot og petsa kon kanus-a buksan ang mga dapit sa turismo.

Subay sa gikatakda nga paglusad sa lalawigan isip "health and wellness destination," ang tanan nga resorts ug tourism activities kinahanglan nga mosubay sa standard health protocol.

Kini sama sa pagpamalit og disinfecting equipment ug uban pa nga kagamitan nga makatabang pagpugong sa pagkatap sa kagaw.

Pagpamutang og mga ali sa customer service area o counters, pagpakatap og alcohols ug sanitizers, pagsul-ob og facemask, face shield ug ang pagpamutang og refilling dili lang sa tubig, apan sa lemonsito ug duwaw nga may dugos nga sagol sa imnunon.

Kinahanglan usab nga ang tanan nga mga gamitunon alang sa tourism activities sama sa mga bangka, life vest ug uban pa i-disinfect.

Alang sa mga mag snorkeling ug diving, di na tugotan nga magpuli-puli sa mouthpiece ug diving tubes.

Tungod ang gitugot mao lang ang 50 porsyento nga kapasidad sa tanan nga mga resort ug tourism activities, kinahanglan nga magparehistro o mopalista daan sa portal o website nga ilusad sa Probinsya.

Niining paagiha, makontrolar ang gidaghanon sa mga kustomer nga modagsa sa usa ka destinasyon.

Gipasabot ni Garcia nga ang pagbukas sa tourism activities paagi nga makabangon pag-usab ang nalusno nga ekonomiya sa lalawigan sa Sugbo.

Kahinumdoman nga tulo ka buwan nga gipaubos sa lockdown o enhanced community quarantine (ECQ) ang Probinsya tungod sa Covid-19.

Sa maong higayon, pipila usab ka mga negosyo ang nasirado diin lakip sa labing naapektohan ang turismo diin nagdepende ang panginabuhian sa liboan ka mga Sugboanon.

Si Garcia gikatakda nga moluwat og kamandoan labot sa mga giya sa tanan nga resort owners ug kustomers niini. (ANV)


Source: Sun.Star Superbalita (https://www.sunstar.com.ph/article/1863615/Superbalita-Cebu/Balita/Whale-shark-watching-sa-Oslob-ubang-tourism-destination-buksan?ref=rss&format=simple&link=link)

No comments