Recent Posts

Breaking News

Wa ma-lockdown, naa diay sa ‘kabit’


MGA duha ka buwan na ang nakalabay, usa ka bana ni-text sa iyang asawa nga di siya makauli kay naabtan sa lockdown sa Dakbayan sa Sugbo tungod sa coronavirus (Covid-19).

Apan naa ra diay siya sa pikas lungsod, nakigpuyo og laing babaye nga minyo usab.

Sa mao nga dapit, nagpatuo siyang ulitawo.

Ang wa niya masayri, usa nila ka silingan nakakita kaniya nga diha na puyo sa usa ka balay nga dunay laing babayeng gikapuyo.

Niadtong Dominggo sa gabii, Hulyo 19, 2020, padulong na unta mangatulog sila si Berto (di tinuod ngan), 35, minyo, construction worker, taga Barangay Mabuli, lungsod sa Tabogon, ug si Joy (di tinuod nga ngan), 37, minyo, taga sityo Pio Veloso, Barangay Antipolo, lungsod sa Medellin, dihang gidakop sa kapulisan.

Si Yen (di tinuod nga ngan) nagpakuyog sa kapulisan sa Medellin aron pag-adto sa balay nga giabangan sa iyang bana sa Barangay Antipolo alas 9:30 sa gabii.

Si Police Corporal Geraldine Areglado sa Women’s and Children’s Protection Desk sa Medellin Police Station nga nahinabi sa Superbalita Cebu, nagkanayon nga si Yen, 34, usa ka tindera, nangayo og abag kabahin sa iyang bana.

Si Police Executive Master Sgt. Mamerto Gastador, imbestigador sa Medellin Police Station nga nahinabi sa Superbalita Cebu, nagkanayon nga padulong na unta mangatulog sila si Berto ug Joy sa ilang pag-abot.

Wa na nakaikyas ang duha sa pag-abot sa taga women’s desk ug ubang mga pulis nga ningkuyog kang Yen.

Nadapatan ni Yen si Joy kay wa na makapugong sa iyang kalagot.

“Naghilak ang asawa kay wala na man mopauli ni iyang bana. Ang text ug tawag nipahibalo nga naabtan sa lockdown. Sus, nahibaw-an man niya nga naa diay laing gikapuyo,” dugang ni Gastador.

Si Yen nibutyag nga ang iyang bana nagtrabaho isip construction worker sa Dakbayan sa Sugbo, nga gipailawom sa enhanced community quarantine (ECQ).

Ni-text ug nitawag kini kaniya mga duha ka buwan ang nakalabay nga di siya makauli kay naabtan sa lockdown.

Nituo siya sa sulti sa iyang bana, apan human niadto wa na ma-contact ug manawag ingon man wa na mopadalag kwarta.

Ang magtiayon dunay 5 anyos nga anak.

Si Gastador niingon nga sa ilang impormasyon nga nakuha gikan sa mga kabanay ni Joy nga si Berto nagpatuo nga ulitawo.

Sila si Joy ug ang pamilya mituo usab kay ang babaye buwag na sa bana sud sa unom ka mga tuig.

Matod ni Gastador nga si Berto niangkon nga duha ka mga tuig na ang relasyon nila ni Joy.

Si Gastador nibutyag nga kasong adultery ug concubinage ang ilang giandam batok sa duha, kinsa gibilanggo sa Medellin police.


Source: Sun.Star Superbalita (https://www.sunstar.com.ph/article/1864216/Superbalita-Cebu/Balita/Wa-ma-lockdown-naa-diay-sa-kabit?ref=rss&format=simple&link=link)

No comments