Recent Posts

Breaking News

Valles, paspas nga nakarekober


PASPAS nga nakarekober si Archbishop Romulo Valles human maospital tungod sa mild stroke, sumala sa opisyal sa Archdiocese sa Davao.

Si Valles, mihimo og indefinite leave isip presidente sa Catholic Bishops' Conference of the Philippines (CBCP).

Kini maoy gipahibalo ni Msgr. Paul Cuison, Vice General sa Archdiocese of Davao isip opisyal nga pamahayag nga gi-post sa Davao Catholic Herald, ang opisyal nga mantalan sa Archdiocese.

"As a close aide of the Archbishop, I am happy to let you know that he is getting back to his normal self in an almost miraculous way, with only a slight problem of his physical movement which is also showing great improvement," matud ni Cuison.

Ang Archdiocese nipagawas og pamahayag human si Caloocan Bishop Pablo Virgilio David nagpahibawo niadtong Biyernes, Hulyo 17, nga temporaryo siyang mohulip isip CBCO president, kon diin si Valles personal nga nihangyo kaniya nga mohulip sa iyang posisyon samtang siya nagrekober. Si David maoy kasamtangang CBCP vice president.

Samtang si Cuison nihatag og detalye sa pagka-ospital sa arsobispo.

Matud niya nga si Valles na-admit sa gabii niadtong Mayo 23, ug nakagawas niadtong Hulyo 6.

"The prolonged days in the hospital was due to some complications like the hospital acquired pneumonia. But he has long been declared by his physicians as stable," dugang ni Cuison, ug nagkanayonnga nakagawas na si Valles sa ospital, ug kasamtangang nagpaalim sa Bishop Residence.

Gisulti niini nga udto niadtong Biyernes, nakadawat siya og text message gikan sa wala panganli nga higala sa Manila, kinsa nangutana sa kahimtang sa panglawas sa arsobispo human mitumaw ang mga balita.

"Since then, social media is flooded with prayers for healing and expressions of support from all over," tug-an ni Cuison kinsa niingon nga "heartwarming" nga makadawat og mga mensahe sa pagpakabana ug pag-ampo alang kang Valles.

Gipasalig sa publiko ni Cuizon nga wa nay angay nga ikabalaka kang Valles kay nakarekober na siya, ug mobalik og pagsaulog og misa sa di madugay.

Unang gipili si Valles isip CBCP president niadtong Hulyo 8, 2017, nga mipuli kang Lingayen-Dagupan Archbishop Socrates Villegas, ug ni-asumer sa posisyon niadtong Disyembre 1, 2017.

Apan sila si Valles ug David subling gipili og balik sa ilang mga posisyon atol sa CBCP Plenary Assembly niadtong Hulyo 2019.

Gisugdan nila ang ilang ikaduhang termino isip presidente ug bise presidente sa CBCP, sa maong han-ay, niadtong Disyembre 1, 2019. Mag-alagad sila gikan Disyembre 1, 2019 hangtud Nobyembre 30, 2021.

Bag-o lang nagsaulog sa iyang ika-69 anyos nga natawhan si Valles niadtong niadtong Hulyo 10. (RGL)


Source: Sun.Star Superbalita (https://www.sunstar.com.ph/article/1864074/Superbalita-Davao/Balita/Valles-paspas-nga-nakarekober?ref=rss&format=simple&link=link)

No comments