Recent Posts

Breaking News

Unsay gibuhat sa Cebu City batok Covid


ANG Cebu City Government maoy labing una nga local government unit nga nakapalit og polymerase chain reaction (PCR) machines ug bugtong local government unit (LGU) sa Sugbo nga nanag-iya niini.

Bugtong LGU usab nga nipalit og liboan ka test kits alang sa coronavirus disease (Covid-19).

Ang Siyudad sa Sugbo maoy nag-inusarang LGU nga adunay negative pressure nga quarantine facility para sa mga symptomatic Covid-19 patient nga gigahinan og kapin sa P50 milyones.

Kini ang pipila sa mga lakang nga gisulti ni Mayor Edgardo Labella atol sa iyang ikaduha nga State of the City Address (Soca) agi og tubag sa mga pangutana sa publiko ug iyang mga kritiko kon unsay gibuhat sa City Government batok sa Covid-19.

Taliwa ning tanan, iyang gipasalamatan ang Konseho nga gipangulohan ni Bise Mayor Michael Rama sa pagpaluyo sa iyang mga lakang batok sa Covid-19 nga nakadaut sa ekonomiya sa Sugbo.

Si Labella, sa iyang pagpamulong, niingon nga sa sayo pa sa pag-igo sa Covid-19, nipalit gilayon ang City Government og tulo ka PCR machines nga gitunol ngadto sa Vicente Sotto Memorial Medical Center (VSMMC) para maoy mo-process sa swab samples gikan sa gidudahang dunay Sars-CoV-2, kagaw nga nagdala sa Covid-19.

Matod ni Labella nga pasiuna usab nga nipalit og 20,000 test kits ang Siyudad, bugtong LGU sa Sugbo nga nakahimo niini.

Nadugangan pa kini pinaagi sa mga donasyon.

Gitumbok ni Labella nga ang pagdaghan sa mga kaso sa Covid-19 sa Dakbayan nagagumikan usab sa kadaghan sa napaubos sa tests kon itandi sa ubang mga dapit.

BATOK COVID

Matod sa mayor nga ang Siyudad nimugna og lima ka clustered clinics alang sa mas paspas nga pagresponde sa mga kaso sa Covid sa mga barangay.

Sa clustered clinics adto makadangop alang sa swab test ang mga lumolupyo nga dunay influenza like illness (ILI).

Gawas niini, nakahimo usab sila og barangay isolation centers (BIC) para sa mga asymptomatic Covid-19 positive nga adunay 3,052-bed capacity.

Ang katukoran sa Cebu City Qurantine Center (CCQC) ug Noah complex nga modawat og naay mild ngadto sa moderate nga simtomas laing lakang sa pagtubag sa Covid-19.

Ang CCQC nakapaayo na og 180 ka tawo nga nataptan sa virus samtang ang Noah makaatiman og 300 ka mga pasyente.

Gipahibawo usab sa mayor nga ang Siyudad dunay 95 ka contact tracing teams nga gilangkuban sa kapulisan, kabomberohan, kasundaluhan, doktor ug nars gikan sa City Health Department.

Ang City Government nigahin og P1 bilyon nga pundo, lakip sa gihatagan mao ang 200,000 ka mga pamilya nga nakadawat tag 25 kilos nga bugas makaduha ka higayon, nga gilakipan og canned goods ug noodles.

Nipalit usab og 20,000 ka personal protective equipment (PPE) alang sa mga frontliner, nipalit og duha ka negative pressure ambulance, 500,000 ka surgical masks alang sa kabarangayan, CCQC ug frontliners.

Nigasto usab og P210 milyones ang City Government isip ayudang pinansyal ngadto sa 80 ka mga barangay isip abag para sa ilang libuan ka mga pamilya.

Si Labella nagkanayon nga giasikaso na sa City Government inabagan sa business community ang pagpabangon sa ekonomiya nga nahagsa gumikan sa epekto sa Covid.

Usa sa tinguha sa Siyudad mao ang pagmugna og mga trabaho .

Ang Cebu City adunay 3,304 ka aktibong kaso samtang 4,583 ang nangaayo sa maong sakit kun 58 porsyento nga recovery rate ug 415 ka kinabuhi ang nakalas.

Ang mayor nanawagan og kahiusahan para sa pagkab-ot sa malambuong dakbayan.

“We should not let partisan political interests get in the way of that most sacred of callings. I’ll be frank, now is not the time for politics,” dugang ni Labella.

UNSAY NABUHAT

Gipahibawo usab ni Labella ang iyang nahimo labot sa iyang prayoridad sa iyang unang Soca niadtong Hulyo 2019.

Bahin sa edukasyon, ang Siyudad nakasugod na sa upat ka building nga adunay tag 16 ka classrooms sa Mambaling, Lorega San Miguel, San Jose ug Sapangdaku.

Aduna pay mosunod nga mga edepisyo sa laing barangay.

Si Labella nigahin usab og P500 milyones para sa libreng school supplies, uniporme sa labing menos 170,000 ka mga tinun-an sa public elementary ug high school.

Ang Siyudad, pinangulohan sa Department of Engineering and Public Works (DEPW) nakigtambayayong sa Department of Public Works and Highways (DPWH) para sa implementasyon sa flood control project ug pagsulbad sa problema sa right of way.

Sa negusyo, gipahibawo ni Labella ang 2-year validity sa business permit, dali nga pagproseso sa pagpagawas sa building permit ug daghan pang uban.

Sa transportasyon, gihan-ay na ang mga term of reference ug ubang mga dokumento alang sa hingpit na nga pag-ilis sa tulo ka dekadang traffic light system sa Dakbayan.

Sa problema sa basura, nakolekta na sa Siyudad ang daghang basura nga kaniadto nagkatag bisan asa nga eskina sa dakbayan gamit ang mga bag-ong garbage truck.

Ang 10 ka andana nga CCMC, matod niya, mahuman sa di pa ang 2022 ug magamit na ang tanang andana apan sa di pa mahuman ang 2020 o sayong bahin sa 2021, magamit na ang 3 ka andana sa maong edepisyo.


Source: Sun.Star Superbalita (https://www.sunstar.com.ph/article/1864453/Superbalita-Cebu/Balita/Unsay-gibuhat-sa-Cebu-City-batok-Covid?ref=rss&format=simple&link=link)

No comments