Recent Posts

Breaking News

Tag P1M sa barangay i-release sa City Hall


ANG Cebu City Government mo-release sa tag P1 milyon nga hinabang ngadto sa 80 ka barangay sa Dakbayan sa Sugbo.

Kini ang gianunsyo ni Mayor Edgardo Labella sa Biyernes, Hulyo 4. Ang pundo gitumong aron adunay dugang pundo nga magasto ang 80 ka mga barangay hilabi na nga gilugwayan ang enhanced community quarantine (ECQ).

Ikaduha na kini nga hugna sa pagpanghatag sa City Government sa 80 ka mga barangay human sila unang nakadawat niadtong Abril og P1 milyon ngadto sa P3 milyones, depende sa populasyon sa ilang lugar.

Sama sa naandan, ang 80 porsiyento sa pundo gamiton para pagpamalit og relief goods ug ang laing 20 porsiyento ipamalit og personal protective equipment (PPE) sama sa face mask, alcohol ug uban pa.

Ang mayor nagkanayon nga ang maong pundo gamiton sa barangay pagpalit og nag-unang panginhanglan sa katawhan.

Himuong prayoridad unya sa ilang pagpanghatag ang mga nagpuyo sa ilang barangay nga nalaktawan sa distribution sa ayuda gikan sa City Government.

Sa kinatibuk-an, niabot na og P210 milyones ang nahatag nga ayuda sa Siyudad ngadto sa 80 ka barangay gawas sa pundo nga dul-an P500 milyones nga relief goods sugod sa pagkuyanap sa Covid-19 sa dakbayan niadtong Pebrero.

Samtang gipadayag ni Cebu City Administrator Floro Casas Jr., nga anaa na sa 90 porsiyento nga nahuman ang distribution sa tag 25 ka kilo nga mga sinakong bugas ngadto sa 80 ka mga barangay. (PAC)


Source: Sun.Star Superbalita (https://www.sunstar.com.ph/article/1862404/Superbalita-Cebu/Balita/Tag-P1M-sa-barangay-i-release-sa-City-Hall?ref=rss&format=simple&link=link)

No comments