Recent Posts

Breaking News

Sugod sa Agusto 3, mokuhag driver’s license, SP online na


SUBAY niining ipatuman nga standardization of driver education isip usa sa mga rekisito sa pagkuha og student permit, driver's license ug nagkadaiyang restrictions codes sa Land Transportation Office (LTO), himuon na usab nga online ang tanang mga transaksyon sa paglukat niini.

Kon magsugod ang pagkinahanglan na sa LTO sa driving course certificates karong Agusto 3, sa dili pa mahuman ang tuig, hingpit nga ipatuman na usab sa ahensiya ang LTO-IT system nila.

Si LTO 7 Regional Director Victor Caindec nagkanayon nga anaa na ang computers nga maoy gamiton alang sa modernization sa ilang systema, apan wa pama-installi sa bag-ong sistema.

Hinuon gibutyag ni Caindec sa Superbalita Cebu nga nagsugod na pagpatuman ang pilot sites niini ug sa Central Visayas anaa kini sa dakbayan sa Tagbilaran ug Dumaguete.

Gihulagway ni Caindec nga mao kini ang mga "problematic sites" sa rehiyon ug mao kini ang usa sa napili nga unahon pagpatuman sa modernong nga LTO-IT system.

Sa LTO-IT system, online na ang tanang transaction sa pagkuha og SP, driver's license ug restrictions codes.

Kini nagpasabot nga wa na unya'y papel nga i-fill up ang mga aplikante sa LTO offices kay anha na kini sa computer iagi tanan.

Wa pa hinuon maklaro kon pwede ba kini gawas sa LTO office o kining ma-access sa website susama sa pamaagi karon sa pagkuha og pasaporte.

Driver Education Centers (DECs)

Subay niining standardization driver education, aduna na'y 23 ka Driving Enhancement Program (DEP) Training Centers ang ilang na-accredit lukop rehiyon.

Nasayran nga alang sa mokuha og student permit, kinahanglan kini mopaubos og 15-oras nga Theoretical Driving Course (TDC) isip usa sa mga rekisito.

Sa mga mokuha og bag-o nga driver's license, parehong professional ug non-professional, kinahanglan kining mopauos sa Practical Driving Course (PDC).

Samtang kadtong mga restriction codes, kinahanglan usab sila sa PDC.

Tanang certificates niini gikan sa DEP Training Centers, i-transmit ra diretso sa LTO susama sa pagkuha sa medical ug drug test isip rekisito sa LTO nga ang testing center na ang mosumiter niini diretso sa ahensiya.

Reklamo

Subay sa maong mga bag-ong rekisito sa pagkuha og dokumento sa LTO, gipanglantawan na nila ang reklamo sa publiko kabahin niini.

"Daghan ang mo-reklamo, daghan ang maglisod. We are just reinforcing the necessity that people who will get a license should be properly equipped," si Caindec isip tubag kon unsa ang hagit nila niining bag-ong lakang.

Base sa LTO Memorandum Circular No. 2019-2176, tumong niini ang "standard of instruction and to develop safety consciousness and positive driving attitudes with the view of minimizing the incidence of road crashes." (HBL)


Source: Sun.Star Superbalita (https://www.sunstar.com.ph/article/1862351/Superbalita-Cebu/Balita/Sugod-sa-Agusto-3-mokuhag-drivers-license-SP-online-na?ref=rss&format=simple&link=link)

No comments