Recent Posts

Breaking News

Special unit sa PAF isip kabahin sa frontline batok sa Covid-19


ANG Pilipinas naapektohan sa Covid-19 pandemic human nipahibawo ang World Health Organization (WHO) niadtong Disyembre 2019 sa daghang kaso sa pneumonia sa Wuhan City, Hubei Province sa China.

Niadtong una, giila kini nga novel Coronavirus o SARS-Cov-2 nga sakop sa pamilya sa viruses, diin naglakip sa SARS ug MERS viruses.

Apan ang WHO niusab sa pangalan niini nga coronavirus disease 2019 (Covid-19) nga daling nikatap sa nagkalainlaing nasod sa kalibotan ug daghan ang nangamatay.

Ang Pilipinas naapektohan sa pandemiya ug nagpadayon sa pakiggubat sa Covid-19.

Si Presidente Rodrigo Roa Duterte nipatuman og hugot nga lakang batok sa dili makita nga kaaway sama sa pagpatuman sa kuwarentina sa tibuok nasod ug lockdowns sa pipila ka dapit nga daghan kaso sukad niadtong Marso ning tuiga.

Ang kagamhanan nihimo og lakang sa pagkontrolar sa pagkaylap sa virus, sama sa travel restrictions, pagsira sa mga tunghaan, physical distancing, face mask, pagsul-ob og personal protective equipment (PPE) sa frontliners ug ubang pag-obserbar sa kalimpiyo sa palibot ug panglawas.

Ang tanang sanga ug ahensiya sa kagamhanan gitawagan sa pagpanginlabot sa gubat batok sa Covid-19.

Ang Philippine Air Force (PAF) nitubag sa panawagan sa kagamhanan ug niapil sa frontline sa gubat batok sa pandemiya.

Ang protocols ug mando gipakanaug ngadto sa labing ubos nga ang-ang sa organisasyon hinungdan nga dunay personnel sa PAF ang gipadala sa frontlines nga naghimo sa nagkalainlaing tahas.

Ang 505th SRG isip special unit sa PAF maoy nag-una sa gubat sa pandemiya. Isip search and rescue unit, ang ilang mga abyon gigamit sa aeromedical missions ug ubang operasyon.

Kini nga unit nitagana sa ilang abyon nga magamit dayon sa panginahanglanon uban sa iyang piloto ug mga tripolante sa abyon.

Nihimo sa tahas sa pagkuha sa PPE gikan sa donasyon sa nagkalainlaing organisasyon nga magamit sa paghimo sa misyong medikal.

Isip anghel nga andam moluwas sa mga kinabuhi, ang 505th Search and Rescue Group nihimo og simulation exercises alang sa insaktong pagdumala sa mga pasyente sa Covid-19 alang sa aeromedical evacuation. Usa kini ka pagpangandam kon ang kaso motaas pag maayo.

Kini nga mga kalihokan magbenepsiyo sa militar ug mga sibilyan, ug ang katawhang Filipino sa kinatibuk-an. Isip nag-unang unit nga giandam ug gihatagan og ekipo sa paghimo sa misyon kon gikinahanglan.

Sa pagkakaron, ang Covid-19 padayon nga hulga sa panglawas sa katawhan.

Dugang sa pamahayag sa PAF, ‘we must fight as one’ alang sa Pilipinas ug tibuok kalibotan.

Ang PAF nibuhat sa ilang bahin sa pagluwas sa kinabuhi samtang duna pay maluwas sa pagpakabuhi. (PR)


Source: Sun.Star Superbalita (https://www.sunstar.com.ph/article/1864066/Superbalita-Cebu/Balita/Special-unit-sa-PAF-isip-kabahin-sa-frontline-batok-sa-Covid-19?ref=rss&format=simple&link=link)

No comments