Recent Posts

Breaking News

Sementeryo giuyonan sa mga taga Sapangdaku


GIUYONAN sa mga lumolupyo sa Barangay Sapangdaku, Dakbayan sa Sugbo ang katukoran sa duha ka ektaryang Cebu City Botanical Garden Cemetery (CCBGC) atol sa public hearing sa Biyernes, Hulyo 17,2020.

Si Kapitan Juvie Lagraso sa Sapangdaku nagkanayon nga 103 ka mga lumolupyo sa iyang barangay ang ningtambong.

Diha usab ang mga opisyal sa Cebu City Hall ug Department of Environment and Natural Resources (DENR) 7 para sayran ang baruganan sa mga lumolupyo.

“Niuyon gyud ang kadaghanan. Naay nikwestyon, pero pag-final na, nipataas sila sa kamot ug nihangyo sila nga safety lang ang himuon sa City Engineering sa mao nga project nga gi proposed,” paghulagway ni Lagraso.

Gipadayag ni Lagraso nga way nisupak, apan adunay pipila nga nikwestyon may labot sa pagbiyahe sa mga lawas sa mga biktima sa coronavirus disease (Covid-19).

Gusto sa mga residente nga masiguro ang ilang kaluwasan batok sa virus.

“Para nako wala gyud na siyay problema kay kaayohan man na sa tanan, dili lang sa barangay Sapangdaku kay makabenepisyo man sab tong uban nga barangay nga walay kalubngan kay ang atong gilantaw nga makatabang sab ang barangay,” dugang sa kapitan.

Ang tukorunon nga sementeryo nahimutang sa sityo Baksan ug Patay nga Yuta nga layo sa sa kabalayan.

Si Mayor Edgardo Labella, sa iyang bahin, nihangop sa maayong resulta sa public hearing.

Iyang gidayeg ang mga tawo sa Sapangdaku kinsa nitabang para di malangay ang paghimo sa sementeryo.

Si Tumulak, kinsa maoy gitahasan ni Labella sa proyekto, nagkanayon nga di magpabaya ang City Government ug ayuhon kini pagtrabaho sa siyudad aron di mabalaka ang mga residente ug masiguro ang ilang kaluwasan.


Source: Sun.Star Superbalita (https://www.sunstar.com.ph/article/1863922/Superbalita-Cebu/Balita/Sementeryo-giuyonan-sa-mga-taga-Sapangdaku?ref=rss&format=simple&link=link)

No comments