Recent Posts

Breaking News

Sementeryo adto na ibutang sa Brgy. Sapangdaku


ADTO na sa Barangay Sapangdaku inay sa Guba tukuron ang Cebu City Botanical Garden Cemetery (CCBGC) nga maoy lubngan sa mangamatay sa coronavirus disease (Covid-19).

Si Mayor Edgardo Labella nagkanayon nga ang luna sa sementeryo adunay gidak-ong duha ka mga hektarya ug mahimo pa nga palapdan.

Kini nahimutang sa sityo Patayng Yuta nga layo sa kabalayan sa barangay.

Bisan kon way jeepney sa dapit, iyang gihulagway nga maagian ra og mga sakyanan kay kongkreto ang karsada.

Unang plano sa Siyudad nga ang sementeryo ibutang sa sityo Catives, Barangay Guba, apan nahimutang kini sa watershed area. Si Labella nipasabot nga dunay environmental isssue ang luna sa City Government hinungdan nga wa nila gidayon ang plano.

Ang mayor wa nibutyag kon unsa nga problema.

Ang Siyudad gipatubag sa Department of Environment and Natural Resources (DENR) tungod sa pagpamutol sa mga kahoy sa dapit.

Si DENR 7 Planning Division chief ug tigpamaba sa DENR 7, Eddie Llamedo, nisusi sa Sityo Patayng Yuta sa Miyerkules sa buntag. Nakita ni Llamedo nga way problema ang dapit kay giila kini nga timberland, di sama sa Barangay Guba nga usa ka watershed area.

Si Labella niingon nga sa di pa masugdan ang pagtukod sa sementeryo gikinahanglang mapasar ang usa ka ordinansa.

Ang mayor ni-certify sa ordinansahon ni Konsehal Dave Tumulak nga urgent sanglit mao kini ang unang gikinahanglan para pagtukod og bag-ong sementeryo.

“I have just certified this morning (Miyerkules) as urgent. Because there is a need for an ordinance from the City Council that before we can put up a cemetery, there has to be an ordinance to be approved by the council,” matod ni Labella.

Si Labella nagkanayon nga mosunod sa mga rekisito ug ubang mga lagda ang City Government para sa katukoran sa maong sam-ang.

Si City Administrator Floro Casas Jr., nagkanayon mga bisan di biktima sa Covid-19, mahimong malubong niini ang mga namatay sa ubang sakit.

Si Sapangdaku Barangay Captain Jovito Ladrazo, sa interview sa SunStar Cebu, nibutyag nga dunay public hearing nga pagahimuon sa Biyernes, Hulyo 17, 2020. (PAC)


Source: Sun.Star Superbalita (https://www.sunstar.com.ph/article/1863655/Superbalita-Cebu/Balita/Sementeryo-adto-na-ibutang-sa-Brgy-Sapangdaku?ref=rss&format=simple&link=link)

No comments