Recent Posts

Breaking News

Rama: CCMC humanon sa ilang termino sa siyudad


SI Cebu City Vice Mayor Michael Rama masaligon nga ang 10-storey building nga Cebu City Medical Center (CCMC) mahuman sa di pa mapupos ang ilang termino sa 2022.

Ang pagtukod sa bag-ong CCMC nagsugod sa 2015, dihang siya pa ang mayor, human maguba ang karaang CCMC sa linog sa 2013.

Si Rama niduaw sa construction site makaduha, niadtong Agusto 2019 ug Hunyo 13, 2020.

Iyang nabantayan nga duna nay dugang kalambuan ang edipisyo apan gamay ra kini itandi dihang siya pa ang mayor hangtod sa 2016.

Bisan sa iyang naobserbahan, si Rama nagtuo nga ang 10 ka andanang building mahuman sud sa duha ka mga tuig, labina nga ang Cebu City Council nanginlabot na sa proyekto aron segurado kining mahuman.

Si Rama niawhag sa iyang mga kauban sa Konseho nga magtambayayong aron mahuman ang CCMC ug duna silay kabilin sa ilang pagbiya.

“Before our term will end, this will be our legacy,” matod ni Rama.

Ang Konseho, sa Hulyo 17, niporma og ad hoc committee aron pag-monitor ug mo-coordinate sa executive department aron sila maapil sa evaluation sa desinyo, planning ug pagpadayon sa pagtukod sa CCMC.

Mga sakop sa ad hoc committee mao sila si Cebu City Councilors Nestor Archival, Raymond Alvin Garcia, Franklyn Ong, Eugenio Gabuya Jr., Donaldo Hontiveros, Phillip Zafra, ug mga sakop sa committee on health.

Gipangulohan ni Rama, ang ubang mga sakop sa komitiba sa panglawas gawas nila ni Zafra ug Garcia, mao sila si Councilors Niña Mabatid ug Renato Osmeña Jr.

Si Archival, sa iyang corollary motion, ni-move nga ang ad hoc committee makigtagbo sa Department of Engineering and Public Works (DEPW) aron pagkuha sa mga detalye sa final program of works and estimates (POWE), ang final costing, ingon man sa final schedule of completion.

Sa ikaduhang semana sa Agusto, ang ad hoc committee moduso sa ilang reports ngadto sa mga sakop sa Konseho.

Si Archival niingon nga kon ang mga sakop sa ad hoc committee makakuha sa final POWE, mao kini ang magsilbeng road map sa proyekto.

Si Archival niingon nga kinahanglang dunay target nga petsa nga mahuman ang hospital “because if we don’t have the schedule then we don’t have a path.”

Ang executive department, sa unang report, nag-target sa paghuman sa unang tulo ka mga andana nga wa mauyoni ni Rama.

Si City Administrator Floro Casas Jr. niingon sa sayo pa nga si Mayor Edgardo Labella gusto nga mahuman nga partial ang tambalanan aron pagtubag sa paghuot sa mga ospital taliwa sa Covid-19.

Si Rama niduso sa paghuman sa tibuok ospital sa di pa kini buksan alang sa publiko, kay ang unang tulo ka mga andana, diin ang una o ground floor naa, magsilbeng parking area. (JJL)


Source: Sun.Star Superbalita (https://www.sunstar.com.ph/article/1864104/Superbalita-Cebu/Balita/Rama-CCMC-humanon-sa-ilang-termino-sa-siyudad?ref=rss&format=simple&link=link)

No comments