Recent Posts

Breaking News

Pulis sa Minglanilla giimbestigar sa kamatayon sa 40-anyos nga lalake


INAHAN sa 40 anyos nga napatay sa pulis sa lungsod sa Minglanilla niadtong Hunyo 21 sa gabii, misinggit og hustisya sa kamatayon sa iyang anak nga iyang gihulagway nga walay sala.

Apan ang hepe sa kapulisan sa probinsya sa Sugbo mipahibawo nga gipaubos na sa imbestigasyon ang pulis nga nalambigit sa kamatayon ug giimbargohan sa iyang armas.

Si Merculisa Racho, 63, taga Lower Calajoan, Minglanilla, ni-post iyang Facebook page labot sa gidangatan sa iyang anak nga gipatay, matod pa, ni Police Staff Sergeant Junarie Bacus Latorre.

Si Latorre sakop sa drug enforcement unit sa Minglanilla Police Station nga nilusad og surveillance sa Tulay Ihawan Daan sa maong lungsod.

Giingong nananghid ang iyang anak nga mouban sa iyang mga barkada ug mga kabanay aron motambong og birthday party sa maong dapit.

Pasado alas 11:00 sa gabii, gibalitaan na lang siya nga ang iyang anak nga si Junrey Racho Maquilan gidala sa Talisay District Hospital human kulataha sa pulis.

Apan dako na lang ang iyang kaguol sa dihang pagka alas 3:00 sa kaadlawon gipahibawo siya sa bana sa iyang pag-umangkon nga namatay na ang iyang anak tungod sa daghang bun-og sa ulo ug sa lawas niini.

Gitinguha unta niya nga magpa-blotter sa police station apan giingong gibalibaran siya sa mga pulis tungod kay aduna nay naka-blotter labot sa iyang anak nga nagtumbok nga misukol kini.

“Hangtud karon wala pa mi nahatagan og hustisya para sa iyang kamatayon. Gusto kung magpa-blotter sa Minglanilla Police Station pero dili nila dawaton kay kinahanglan daw naay witness ug abogado,” matod sa inahan sa iyang Facebook page.

“Unya sakit kaayo hunahunaon kay mas nakapa-blotter pa ang pulis kaysa kami nga namatyan, nagpa-blotter ang pulis og direct assult sa akong anak. Ingon siya nga ni-self-defense ra daw siya, matud pa sa iyang report. Pero kung tarung siyang pagkapulis, nganong patyun pa man gyud niya,” dugang sa inahan sa iyang mensahe sa Facebook.

Adunay usa ka .22 Magnum nga nakuha, sumala sa mga pulis, gikan sa namatay nga gigamit sa pagsuway sa pagpusil sa pulis.

Apan gihimakak kini sa iyang inahan bahin sa alegasyon nga dunay armas ang iyang anak.

Si Police Colonel Roderick Mariano, hepe sa Cebu Provincial Police Office (CPPO), mibutyag nga human sa insidente gipaubos na dayon sa imbestigasyon ang pulis.

Giimbargohan na kini sa iyang armas ug giparelibohan sa katungdanan samtang nagpadayon ang gihimong pakisusi labot kaniya.

“The chief of police is already conducting yung kanyang investigation, even though na yung suspect, yung ating policeman ay na disarmahan na and his firearms is subjected sa crime lab. Na-submit na rin siya together with the firearm na recovered sa area and then pina-paraffin din natin yung suspect. Walang ipag-alala yung ating relatives na hindi natin ginawa o hindi ginawa ng ating cop yung basic yung rules ng engagement,” matod ni Mariano.

Apan gipahibawo usab si Mariano sa iyang sakop nga usa ka lihitimo ang nahitabo tungod kay nagpahigayon matod pa sa iyang surveillance ang pulis nga si latorre nga sakop sa drug enforcement unit sa maong police station.

Si Junrey Racho Maquilan giingong usa ka drug personality gani bag-o lang kini naka gawas sa bilangoan nunot sa plea bargaining apan sa dihang nabantayan matod pa niini nga adunay pulis nga nag lingkod sa motor kalit lang kini nga miduol ug misuway sa pagpamusil.

“He is conducting ng intelligence duon sa area because yung talagang maraming report ng about sa drugs. So nakaupo sya sa isang motor in yung suspek nilapitan siya at binaril at base duon sa mga nakuha duon yung ating witnesses yung ating mga imbestigador duon yung mga kainoman ,” dugang ni Mariano.

Bisan pa man niini mipasalig si Mariano sa kabanay nga ilang ipaagi sa proseso ug kung masuta nga adunay nalapas ang iyang sakop iya kining pasakaan og kasong kriminal ug administratiba.

Kasamtangan nga naka- camp restriction sa Minglanilla Police Station ang pulis ug nagpaabot pa sa mahimong resulta sa imbestigasyon sa kapulisan. (AYB)


Source: Sun.Star Superbalita (https://www.sunstar.com.ph/article/1863651/Superbalita-Cebu/Balita/Pulis-sa-Minglanilla-giimbestigar-sa-kamatayon-sa-40-anyos-nga-lalake?ref=rss&format=simple&link=link)

No comments