Recent Posts

Breaking News

Porlon gisuroy, lungon gi-display sa Lapu


PAAGI sa pagpahimangno ngadto sa mga Oponganon dangatan kon mataptan sa coronavirus disease (Covid-19) gilusad sa kagamhanan sa dakbayan sa Lapu-Lapu ang dili kasagaran nga rekoreda sa kalsada kagahapon, Martes, Hulyo 7.

Sa maong kalihokan porlon maoy gigamit sa pagsuroy sa dakbayan dungan sa pagbandera sa tarpaulin nga adunay natala: "Namatay sa Covid kay wala mag facemask" ug "Stay at home aron dili ka masulod sa lungon" dungan sa pagpang apod-apod og leaflets sa mga tawo nga malabyan.

Ang maong leaflets adunay inpormasyon sa kinatibuk-ang data sa mga nangamatay sa Covid-19 sa tibuok kalibutan, Pilipinas ug Lapu-Lapu City.

Samtang ang mga lungon giplastada ngadto sa mga checkpoint areas sama sa tiilan sa Mandaue-Mactan Bridge, merkado publiko sa Barangay Poblacion ug Buaya.

Sa gipahigayon nga virtual press conference ni Lapu-Lapu City Mayor Junard Chan via Zoom nga nakahukom siya sa maong lina-ing pamaagi aron epektibo gayud nga masulod sa alimpatakan sa mga Oponganon nga dili tiaw ang naasoyng sakit ug daghan na ang namatay niini.

"Kaning Porlon dili kanang mga latest karon nga sakyan sa mga turista nga Starex, kadtong porlon nga karaan nga makakita ka mahadlok ka sa nawong. Unya unsa may tukar nga atong ipaduyog? Kanang kanta nga makapanghinuklog sila," matod ni Chan.

Katuyoan sa mayor nga mokunhod ang gidaghanon sa kaso nga nagpositibo sa Lapu-Lapu.

Sa miaging semana moabot sa 80 ka mga traysikol drayber ang gi-hire ni Chan aron maglibot-libot sa kabarangayan ug mopahimangno mahitungod sa makatakod nga virus.

Nanawagan na usab siya sa konseho sa dakbayan nga tugotan ang citizen's arrest batok niadtong nagmagahi sa paggamit niini ilabi na niadtong way mga quarantine pass nga magsuroy-suroy.

Sa uwahing tala sa kaso Covid-19 sa dakbayan moabot na kini sa kapin 800. (GCM)


Source: Sun.Star Superbalita (https://www.sunstar.com.ph/article/1862798/Superbalita-Cebu/Balita/Porlon-gisuroy-lungon-gi-display-sa-Lapu?ref=rss&format=simple&link=link)

No comments