Recent Posts

Breaking News

Pilipinas maglisod pagdepensa sa SEAG title


GILAUMANG maglisod ang Team Philippines pagdepensa sa overall title human gipagawas ang inisyal nga listahan sa sporting events nga kombatihan sa 2021 Southeast Asian (SEA) Games sa Vietnam.

Sa 36 ka sporting events nga naa sa inisyal nga listahan, wala ang arnis, skateboarding, obstacle course, jiujitsu, e-sports, sailing, soft tennis, triathlon, sambo, surfing, wakeboarding, windsurfing, modern pentathlon, baseball, duathlon, rugby, softball ug squash.

Ning maong mga event, ang Team Philippines nakahakot og 58 ka gold medals sa 2019 nga edisyon sa matag duha ka mga tuig nga kompetisyon nga gi-host sa Pilipinas.

Ang Team Philippines midominar sa 2019 Manila Games pinaagi sa makabungog nga 149 gold medals, 117 silver medals ug 121 bronze medals nga nagtunol sa nasod sa Pilipinas sa ikaduhang overall title niini sa 11-nation competition.

Human madawat ni Philippine Olympic Committee (POC) president Abraham “Bambol” Tolentino ang suwat nga nagbutyag sa inisyal nga listahan sa sporting events, nagplano na dayon kining moapelar niini.

“We will lobby for those events that we’re strong at like arnis, triathlon,” matod ni Tolentino, kinsa mao usab ang head sa PhilCycling, ang governing body sa cycling sa Pilipinas.

“Other nations may lobby for sambo so I might include in the appeal the obstacle course.”

Sa Manila SEA Games, miabot sa 56 ka events ang gikombatihan nga usa ka rekord sa kompetisyon apan gikunhoran kini sa Vietnam og 20 ka events sa ilaha na unyang pag-host sa kompetisyon.

Hinuon dili pa kini pinal ug posible pang adunay madugang nga events.

Sama sa naandan, ang host nga nasod hatagan og katungod nga mopili sa ilang gustong ilakip nga sporting events. Ang ubang nasod gitugotan usab mohatag sa ilang mga sugyot.

Nag-una sa inisyal nga listahan alang sa Hanoi SEA Games mao ang medal-rich athletics ug aquatics swimming.

Anaa pud ang archery, badminton, 3x3 ug 5x5 basketball, billiards and snooker, boxing, canoe-kayak, chess, cycling, dancesport, fencing, football and futsal, golf, gymnastics, aerobic, handball, judo, karate, muay, pencak silat, petanque, rowing, sepak takraw, shooting, table tennis, taekwondo, tennis, indoor and beach volleyball, weightlifting, wrestling, wushu, fin swimming, body building, kurash, kick boxing ug vovinam. (RSC)


Source: Sun.Star Superbalita (https://www.sunstar.com.ph/article/1863393/Superbalita-Cebu/Balita/Pilipinas-maglisod-pagdepensa-sa-SEAG-title?ref=rss&format=simple&link=link)

No comments