Recent Posts

Breaking News

Panagpundok, non-contact sports gitugot


GITUGUTAN na sa pagpahigayon og mass gatherings o pagpahigayon og pundok sa mga dapit sa Lalawigan sa Sugbo nga ubos na sa modified general community quarantine (MGCQ).

Kini usa lang sa mga nalistang gitugot sa giluwatan nga 17 ka panid nga executive order ni Cebu Governor Gwendolyn Garcia labot sa mga protocol ug guidelines nga angay nga sundon sa mga Sugboanon sa lalawigan.

Ubos sa Executive Order (EO) No. 20, gitugot ang mass gathering, apan kinahanglan nga mananghid sa lokal nga kagamhanan aron makapahigayon og kalihukan pinaagi sa pagkuha og permit.

Kinahanglan usab nga ang pagtigom nga himuon di molapas sa 50 porsyento nga kapasidad sa usa ka dapit.

Gimando usab ang estrikto nga pagsubay sa physical distancing, mandatory nga pag sul-ob og mask ug pag-disinfect.

Gihatagan og gahom ang mga local government unit (LGU) nga magdesisyon kon tugotan ba kini o dili.

Giklaro sa gobernador nga ang tari, tigbakay ug uban pa estriktong gidili.

Gawas sa pagpahigayon og pundok, gitugotan ang tanan nga non-contact sports sama sa zumba, biking, running, badminton, equestrian, skateboarding, jogging, golf ug swimming.

Ang pag basketball ug volleyball estriktong gidili. (ANV)


Source: Sun.Star Superbalita (https://www.sunstar.com.ph/article/1863036/Superbalita-Cebu/Balita/Panagpundok-non-contact-sports-gitugot?ref=rss&format=simple&link=link)

No comments