Recent Posts

Breaking News

Pagkuha'g gate pass sa 23-C gisumsuman sa social media


NAKAANI og reaksyon sa social media ang nahitabo kagahapon nga panaglinya sa pipila ka mga residente sa Barangay 23-C, Poblacion District, Davao City.

Sa post sa Superbalita Davao Facebook page, makita sa hulagway nga naglinya ang mga residente nga daw wala na napatuman ang one meter social distancing, Hulyo 21, 2020, sa Mini-Forest Gym.

Dugang makita sa mga hulagway nga kuha ni SunStar news photographer Macky Lim nga nagdikit na ang mga residente gumikan gustong malista ang pangalan sa awtoridad aron makakuha sila og "blue card" isip gate pass aron makagawas labi na kadtong dunay mga trabaho ug dunay essentials nga gimbuhaton.

Nagbaha ang comments sa netizens diin kadaghanan miingon nga gahi og ulo ang pipila ka mga residente sa Barangay 23-C, apan duna say mikomento nga wala lamang kabalo ang katawhan sa sitwasyon sa mga residente maong nahimo na lang ang pagdikit sa pagpaneguro nga makakuha og gate pass.

Sa komento sa usa ka netizen nga si Cindy Sinaloba Adolfo ngadto sa iyang komento sa nag-comment sab sa post, "Ayaw pag-istorya'g ing-ana kay naningkamot ang mga tawo makagawas kay hubas na gyud ilang panudlanan ug puno na sila sa utang unta ang mga opisyales ilang gihan-ay. Dapat nihatag sila og schedule sa by purok nga makagawas para dili magrambol ang mga tawo, wala ba nila na isip nga mao gyud na ang mahitabo. Nag-lift sila sa lockdown wala man pod sila nagpagawas og guidelines."

Ang netizen sab nga si Jelce Smith nagsulti sa iyang comment nga, "Dili na sayop sa mga tawo, unta nag-isip og sakto nga pamaagi ang mga opisyales nga dili magkayagaw ang mga tawo kay ang mga tawo diri gusto na mogawas para makapanginabuhi," tipik sa iyang comment.

Sa usa ka open letter nga na-post sa Facebook ni Bailyn Dima, gisaysay niini nga sa mga panghitabo atol sa hard lockdown walay nadungog ang gobyerno sa reklamo sa katawhan.

"Wala mo nakadungog og reklamo sa amoa atong 18 nga supposed to be last day na sa 2 weeks lockdown. Nakasabot mi nga basihan pa ang swab test results. Nag 19, 20 na nagpaabot ra gihapon mi sa update if ma-lift na ba or dili kay kabalo mi dili man gyud agad2x ang result sa swab test," tipik sa open letter nga na-post ni Bailyn Dima.

Kahinumdoman nga Hulyo 20, takna nga alas 12 sa udto, gitanggal na sa kagamhanang lokal sa dakbayan sa Davao ang pag-hard lockdown sa maong barangay.

Apan gipasabot ni Davao City Mayor Sara Duterte-Carpio nga magpadayon gihapon ang house ug purok lockdown gumikan sa rekomendasyon sa health department sa Rehiyon Onse labot sa kaso sa Coronavirus Disease (Covid-19) sa maong dapit.

"Security and health protocols will continue to be strictly observed during the purok/household lockdown, while food and other basic necessities will be given to the affected residents. These actions are being taken to prevent the massive spread of the killer virus in and outside of the area due to confirmed positive cases," sa pahibalo sa lokal nga kagamhanan sa siyudad.

Kung kahinumdoman sab, nagpositibo sa Covid-19 ang pulis nga nagbantay sa lugar sa milabay nga semana nga maoy hinungdan nga gi-lockdown ang Davao City Police Office (DCPO) suma sa spokesperson niini Police Captain Rosario Aguilar.

Sa bahin sa DCPO sa pagdasok sa katawhan sa pagkuha og gate pass, tubag sa DCPO, "Kompleto ang atong pagpasidaan sa mga residente bahin sa social distancing. Ang kinahanglan man gyud unta ang responsibilidad sa matag usa diha sa kaugalingon nga kinahanglan gyod ipatuman ang distancing. Sa karon (ala 1:05 sa hapon) nahapsay na ang paghatag og gate pass sa mga nagtrabaho ug dunay mga essentials nga gimbuhaton."

Sa maong hitabo, gisulayan sa pagkuha ang pamahayag unta sa mga opisyal sa barangay sa dapit pinaagi sa telepono kagahapon, apan wala makuha ang bahin ni Barangay 23-C Kapitan Alimoden "Wating" Usman labot sa insidente. (Jeepy P. Compio)


Source: Sun.Star Superbalita (https://www.sunstar.com.ph/article/1864293/Superbalita-Davao/Balita/Pagkuhag-gate-pass-sa-23-C-gisumsuman-sa-social-media?ref=rss&format=simple&link=link)

No comments