Recent Posts

Breaking News

P1M nga shabu nasakmit sa PDEA; 3 ka suspek nasikop


NIBALOR tanan og P1 million ang nasakmit nga gidiling drugas sa duha ka managlahi nga operasyon sa Philippine Drug Enforcement Agency (PDEA) 7 ug Mambaling Police Station 11 lakip na sa operatiba sa Police Drug Enforcement Group (PDEG) Visayas Field Unit.

Tulo ka suspek ang gidakop.

Dominggo, pasado alas 5:00 sa hapon, si Johnry Tabalin, 29, ug molupyo sa Sityo Camansi sa Barangay Mambaling, siyudad sa Sugbo nasikop.

Nasakmit gikan kang Tabalin ang 100 gramos nga shabu nga dunay kantidad nga P680,000 subay sa Dangerous Drugs Board (DDB) value.

Si IA 1 Jessie Cabutotan sa PDEA 7, nangulo sa buy-bust, nihulagway kang Tabalin nga high value target.

Sa ikaduhang hugna sa gihimong operasyon sa Sityo Lawis sa Barangay Pasil, siyudad sa Sugbo, duha ang ilang nadakpan.

Si IA lll Ivy Clare Oledan, nangulo sa anti-illegal drug operation, nga miresulta sa pagkasikop nila mo Januario Mier, 28, ug Marvin Mendoza, 23, ug pulos lumolupyo sa Barangay Pasil.

Nasakmit gikan sa duha ang moabot na sa P348,000 nga balor sa drugas subay sa iyang DDB value.

Matod ni Oledan nga ang duha ka mga semana nga gimonitor ang ilegal nga kalihukan ni Mier.

Dugang ni Oledan nga si Mier kinsa maoy ilang target samtang naabtan usab sa dapit si Mendoza, kinsa maoy batabata ni Mier.

Ang dinakpan niangkon sa iyang pagpamaligya sa gidiling drugas.

Matod ni Mier, usa siya ka utility sa usa ka ka establisimento apan tungod sa krisis sa Covid-19, natagamtaman gna wala na kini pundong salapi hinungdan nga sekreto nga namaligya og gidiling drugas.

Ang tulo pulos gitanggong sa bilanggoan ug mag-atubang sila og kaso nga kalapasan sa R.A. 9165 o kalapasan sa Dangerous Drug Act of 2002. (BBT)


Source: Sun.Star Superbalita (https://www.sunstar.com.ph/article/1863396/Superbalita-Cebu/Balita/P1M-nga-shabu-nasakmit-sa-PDEA-3-ka-suspek-nasikop?ref=rss&format=simple&link=link)

No comments