Recent Posts

Breaking News

P1M nga hinabang sa matag barangay gitunol ni Labella


ANG Cebu City Government nipagawas na sa tag P1 milyon nga financial aid ngadto sa 80 ka mga barangay sa Dakbayan sa Sugbo, Hulyo 13, 2020.

Si Mayor Edgardo Labella maoy nangunay pagtunol sa hinabang ngadto sa 38 ka mga barangay sa iyang buhatan sa City Hall.

Ang pundo maoy magsilbing ayuda sa City Government ngadto sa 80 ka mga barangay para ilang ipalit og hinabang sa ilang libuan ka mga konstituwente niining panahon sa coronavirus disease (Covid-19) pandemic.

Ang mga barangay nga nakadawat sa financial assistance mao ang Sapangdaku, Talamban, San Nicolas Proper, Camputhaw, Apas, Punta Princesa, San Antonio, Sambag 1, Mabini, Agsungot, Tejero, Hipodromo, Bonbon, Carreta, Pit-os, Sirao, Sinsin, Lahug, Pulangbato.

Nakadawat usab ang Mambaling, Luz, Lorega San Miguel, Duljo Fatima, Cogon Pardo, Quiot, Bacayan, Taptap, Pung-ol Sibugay ug Ermita.

Apan adunay mga kapitan kansang tseke andam na kagahapon, apan wa makatunga.

Kini gilangkuban sa Barangay Busay, Labangon, Sudlon-2, Binaliw, Pahina Central, Kinasang-an, Kasambagan, Pamutan, Basak San Nicolas ug Sudlon 1.

Si Kapitan Clifford NiƱal sa Pahina San Nicolas nagkanayon nga prayoridad nila ang pagpalit og bugas.

Nagplano sab siya nga mopalit og oxygen tank para pag-transport nila og pasyente gikan sa barangay paingon sa ospital.

Mao sab kini ang prayoridad ni Kapitan Peter Dumaolao sa Agsungot sanglit matod niya, importante ang pagkaon sa mga tawo hinungdan nga bugas ang iyang unahon.

Si Kapitan Daido Abcede Jr., sa Barangay San Antonio nagkanayon nga bugas ug posibleng mga personal protective equipment (PPE) para sa iyang mga molupyo ang iyang paliton.

Ang mga barangay moduso lang sa ilang utilization report kon giunsa paggasto ang kwarta ug adto na sila mo-liquidate sa ilang gasto sa Commission on Audit (COA.

Ang paghatag og ayuda sa City Government balor og P80 milyones para sa 80 ka barangay maoy ikaduhang hugna.

Si Labella unang niapud-apod sa P130 milyones para gihapon sa 80 ka barangay, diin matag usa nakadawat og P1 milyon, P2 milyones ug P3 milyones depende sa gidak-on populasyon sa lugar. (PAC)


Source: Sun.Star Superbalita (https://www.sunstar.com.ph/article/1863401/Superbalita-Cebu/Balita/P1M-nga-hinabang-sa-matag-barangay-gitunol-ni-Labella?ref=rss&format=simple&link=link)

No comments