Recent Posts

Breaking News

P107M pinayuhot nga yosi sakmit


KANTIDAD sa P107 milyon ang gipayuhot nga sigarilyo nga nasakmit sa Port of Davao, sumala sa taho sa Bureau of Customs Davao (BOC-Davao) niadtong Martes, Hulyo 22.

Subay sa taho, gibutyag sa BOC-Davao nga ang upat ka 40-footer containers nga dunay ilegal nga giimpotar nga sigarilyo kantidad og P107,414,676.74 nga gi-consigned sa Golden Aark Enterprises nasakmit sa Davao International Container Terminal (DICT).

Mga kontiner giingong dunay sulod nga 1,205 karton sa Astro Branded Cigarettes, 1,884 karton nga YS filter cigarettes ug 941 Fort Branded Cigarettes nga gideklara nga bag-ong brand sa tissue papers.

Sumala sa BOC-Davao, ang consignee wala nagbutang og shipment details ug uban pang derogatory information sa e-manifest – usa ka sistema nga gigamit sa BOC aron madeterminar ang detalye sa kargamento ug ang gipadal-an nga "port of destination".

Nagpagawas na si BOC Davao district collector Erastus Sandino Austria og Warrant of Seizure and Detention (WSD) sa maong kontrabando sa kalapasan sa Executive Order No.245 "Amended Rules and Regulations Governing the Exportation and Importation of Leaf Tobacco and Tobacco Products", Graphic Health Warnings (GHW) Law o R.A. 10643 ug section 117 sa R.A. 10863 o ang Customs Modernization and Tariff Act (CMTA).

Niadtong Hunyo 3, 2020, ang sub-port sa BOC-Davao sa Dadiangas, General Santos City nakasakmit sab og 1,325 karton nga gipayuhot nga sigarilyo gikan sa Vietnam kantidad og P24 milyon. ROB A. GUMBA


Source: Sun.Star Superbalita (https://www.sunstar.com.ph/article/1864410/Superbalita-Davao/Balita/P107M-pinayuhot-nga-yosi-sakmit?ref=rss&format=simple&link=link)

No comments